Ye zindagi bhi meri ek khuli hui kitaab hai
 

Ye zindagi bhi meri ek khuli hui kitaab hai
Yaha gham-o-khushi bhi eik saath dastiyaab hai

Hawa ke saath guzra ajnabi qareeb se merey
Voh ghair hi sahi magar voh fard la-jawaab hai

Mai mutmaein na ho saka ye zindagi se aye khuda
Na jaaney zindagi mai merey kitne aur azaab hai

Naseeb har kisi ka khush-gawaar hota bhi nahi
Chamakta hai jo raat ko voh sirf maahtaab hai

Ye aarzuu- e -baada- e -tuhoor kaisey puri ho
Jo dastiyaab hai voh toh be-zaaiqa sharaab hai

Naqaab-e-surat-e-kashish utha ke roshni ho ab
Ke tera deed aye sanam merey liye savaab hai

Ye zindagi meri sawarney bhi lagi hai hum-nawa
Mujhe fakhar hai mere zeest ka tu intakhaab hai

Taveel ho ye zindagi ya ho hayaat-e-mukhtasar
Jo baad-e-maut zinda ho voh fard kamyaab hai

Khuda sabhi ko ek sa sifat nawaazta nahi
Na kar ghuroor tu agar falak ka ek shihaab hai

Kabhi na socha tha ye zeest yu sawar bhi jaye gi
Khuda khushi se ab toh meri zeest faizyaab hai



FEW MEANINGS


• Dastiyaab= available
• Fard= individual
• Mutmaein= satisfied
• Azaab= pain/trouble
• Maahtaab= moon
• Aarzuu-e-baada-e-tuhoor= desire for nectar of paradise
• Be-zaaiqa= tasteless
• Naqaab-e-surat-e-kashish= beautiful face covered by veil
• Deed= sight/view
• Savaab= reward for good work
• Zeest= life
• Intakhaab= selection
• Taveel= long
• Hayaat-e-mukhtasar= short life
• Baad-e-maut= after death
• Sifat= virtue/quality
• Shihaab= a bright shinning star
• Faizyaab= blessed