Sukh dukh mein sath nibhane ko wo mere paas aa jati hai
thoda sa ghabraati hai aur thoda hichkichaati hai
Meri Maa mere ghar aati hai...................
subah ki chaai banaane mein bhi kitna wo sakuchaati hai
Kahaan padi hai cheeni patti poochne mein sakuchaati hai
Meri Maa mere ghar aati hai...............
Khana main hi pakaungii...zidd par atak si jaati hai
kaam bata kya karna hai..kar ke hi chain wo paati hai
Meri Maa mere Ghar aati hai..........
bas-2 kitna khaungi main? keh kar ke aankh churaati hai
'Beti ka ghar' bol bol kar...mujhko kitna tadpaati hai
Shaam ko jab main thak jaati hu...sar par tel lagaati hain
god mein jab main sar rakh doon to dheere se sehlaati hai.
saari chinta saari fikrein hawaa mein ud si jaati hain
jab houle se paas aaker wo apne gale lagaati hai
Baccho ko wo paas bithakar....kisse roz sunaati hain
kabhi kabhi to unhe dekh kar naani ki yaad aati hai
kabhi jo laa du tohfa koi lene se katraati hain
duniya ki ye reet nahi hai ..roz mujhe samjhaati hain
Chaar paanch hi dino mein itni vyakul si ho jaati hai
kehti nahi par mujhe pata hai...bhai ki yaad sataati hai
Jaane ka din aa jata hai..jane kyu itni jaldi
abhi to aayi thi maa meri..abhi abhi dekho chal di..
Har baar wo waapas jaati hain to mujhko bohut rulati hain
Beti hoti hai kyu paraayi? sawaal chod kar jaati hai...
Meri maa mere ghar aati hai .............meri maa mere ghar aati hai..
..
sarika...kitni sahajta se tumne un sare bhavon ko laybaddh kar diya hai jinhe ham ladkiyaan kabhi maa ke samne vyaqt nahi kar pate....akhir tak aate aate aankhein bhar aayiin meri...maa ki hichak to shayad unki jagah pahunch kar hee samjh paungi main...par unke vyavhaar se dil me jo bhaav aate hain vo saaf nazar aaye tumhari kavita padhkar......
Kab se intzaar tha ki tum kuch likho..Der se hee sahi par Bahut bahut sundar rachna huyi hai...bahut sari shubhkamnayein...aise hee likhti raho..
Luv
Madhu..