Quote:
Originally Posted by zarraa
shamma-e-hasrat-e-deedaar farozaaN rakhiye
rukh-e-roshan ki tapish le ke jalaaya keeje
lab ki raNgeeniyoN se surkh banaaya keeje
zulf ki raat ke saaye meiN sajaaya keeje
narm sargoshi ke jhoNkoN se pareeshaaN rakhiye
shamma-e-hasrat-e-deedaar farozaaN rakhiye
hai n do din ka junooN ye to muhabbat bhi naheeN
us taraf rabt hai thorha sa ke nisbat bhi naheeN
aur maaloom koyee wasl ki soorat bhi naheeN
ho tawakko n jinheiN dil meiN wo armaaN rakhiye
shamma-e-hasrat-e-deedaar farozaaN rakhiye
kitni taareek hai har chaah ye ujli kab hai
jaane kitne haiN fareb is meiN ye asli kab hai
ishq ka naam tamanna hai tasalli kab hai
khud ko be-zauq hi rakhiye ke pashemaaN rakhiye
shamma-e-hasrat-e-deedaar farozaaN rakhiye
dil n duniya se laga aur uthaaya n gaya
haal apna n sunaaya ke chhupaaya n gaya
jis ko paaya n gaya us ko bhulaaya n gaya
ab kahaaN ja ke rakheiN jism kahaaN jaaN rakhiye
shamma-e-hasrat-e-deedaar farozaaN rakhiye
kis ki yaadoN se hai raNgeen tera saada jamaal
teri tanhaaiyoN meiN saath chale kis ka khayaal
paas hote to tumheiN poochh bhi leta ye sawaal
n mileNge wo jawaaboN ka bhi imkaaN rakhiye
shamma-e-hasrat-e-deedaar farozaaN rakhiye
yooN to kitne haiN yahaaN chaaraghar aage mere
zakhm aise ke nazar un ko n aate mere
ab to nashtar koyee seene meiN chala de mere
dil ko mehsoos ho kuchh is meiN wo saamaaN rakhiye
shamma-e-hasrat-e-deedaar farozaaN rakhiye
- zarraa
|
Waahhh bahot khoob
Khoobsoorat nazm k sath bazm ki raunak badh gayi hai aapki aamad se...
Daad kubool karein..