Quote:
Originally posted by maikasH
aadaab dosto,
Ghazal ka matlaa pehle likha , socha tha ke ek musalsal Ghazal kehne ki koshish karuuNga lekin phir Gham-e-yaaraN ke takaazey se mooNh na phera gaya to Ghazal yuuN huii, aapki khidmat meiN pesh kar raha huuN
Ghazal ka matlaa mere ustaad-e-mutarim ke aNdaaz-e-sukhan ka saaya hai, voh aksar ziNdagi ki kadvi sacchaiiyoN ko sukhan meN dhaalte rahe haiN, maine kabhi tassavur taq na kiya tha ke maiN kabhi is silsiley meiN koi she'r kahuuNga lekin in dinoN ziNdagi kuch aisi berukhii se pesh aa rahi hai ke yuuN hi chalte chalte do misrey zehan meiN aaye aur is Ghazal ka aaGhaaz hua.....pehle do misroN meiN ek aise mehnatkash aadmi ka haal-e-dil bayaan karne ki koshish ki hai jo din bhar jee toD mehnat karta hai aur shaam ko jab uski hatheli par do sikkey Tikaa diye jaate haiN jis se voh apna aur apne parivaar ka ek liye do roTiiyaaN taq na khareed sake to voh apne haathoN ke zakhmoN ko dekhte hue ro padta hai.........khair aap Ghazal mulaiiza kijiye :-
miley na jo mehnat se do bhi nivaale
roya maiN dekh apne haathoN ke chhalley
kareiN bhi gilaa ab to kis se kareiN
humhiiN ne to saaNp aasteenoN meiN paale
Gham-e-ziNdagi ke aNdheroN meiN jaanaaN
terii yaad ki sham'aa se haiN ujaale
kuch aur hi baat thi unki saaqi
vo dete the bhar ke jo aaNkhoN se pyaale
badi aarzoo hai ke mehNdii lagaa kar
vo aa ke mere kafn pe khaak daale
chali aana saara jahaaN aazmaa kar
maiN baiThaa huuN apni wafa ko saNbhaale
"maikash" tere baad dhooNdeNge tujhko
"sharaabi,sharaabi" tujhe kehne vaale
kahir aNdesh
maikash
|
waah waah maikash ji ek aur bahtareen kalaam ,aap ke khazaane se nikal kar hamaare saamne aa gaya,aap ka ye kalaam zindagi ki kuchh kadvi aur viprit paristhitio ko bayaan karta hai, lekin mai ye maanta hu ke koi bhi khraab paristhiti mai aadmi ko apni dhairya shakti,apne hosale,apne sanskaar,apne usool nahi chhodane chahiye
regards manu
mai ismai kuchh add karta hu,shayad aap ko pasand aaye
Andhero ne mil kar agar ghera hai hamko
Aa mil kar saath apne jakhmo ko hi jalaale
Parvarish-e-lauho-kalam karte rahenge
dil pe jo gujri hai kyun aankho se nikaale
ummido ki patwaaro se tufaano se ladenge
Apne haatho ke hoslale hai apne rakhwaale
Viraani-e-daura pe karam karte rahenge ham
Talkhi-e-ayaam ka saath mil kar nibhaale
Parvarish-e-lauho-kalam =takhti aur kalam ka upyog
( kavyarachna)
Viraani-e-daura pe= sansaar ki viraani
Talkhi-e-ayaam = jivan ki viparit , kathin ,kadvi par sachhi
paristhitiya
hope u like d same
regards
take care
manu