Quote:
Originally Posted by maikasH
kaNdhey pe zaraa haaTh dharo maiN nashe meiN hooN
maikash do kadam saath chalo maiN nashe meiN hooN
phir aaiinoN se "maikash" nazreN churaa ke roye
tujhe aazmaane waale tujhe aazmaa ke roye
muqeem ik chiraaGh e hasrat do diloN ke darmiyaaN tha
maiN jalaa jalaa ke roya voh bhujhaa bhujhaa ke roye
meri aah ko ataa kar voh balaa ka dard ya rab
mere Gham pe haNsne waala mere paas aa ke roye
aashnaayi apni Gham se is darjaa ba-wafaa thi
kabhi mil gayi khushi to bahaana banaa ke roye
phir saath aa gaya hai yeh zehan ka khalall saaqi
kuch de’r is ko keh de kahiiN aur jaa ke roye
maqta maiN paDh ke thehruuN, kuch aisa mojezaa* ho
hoNThoN meiN voh sitamgar dupatta dabaa ke roye
mojezaa* = karishma
is haal meiN haiN lauTe kuu-e-yaar* se ai “maikash”
jo liye KhaDe the paTThar voh galey lagaa ke roye
kuu-e-yaar* = yaar ki gali
|
Wah Wah Maikash Bhai
Kya khoob Ghazal kahi hai aapne. Meri daad iss sher ki shakl meiN pesh hai. Qubuul farmaayen.
Maikash tere kalaam ke qayal to yuN bhi hum haiN
Ik ek sher padh ke hum muskuraa ke roye
Aur ye sher yaani maqta KhususaN kamaal laga.
is haal meiN haiN lauTe kuu-e-yaar* se ai “maikash”
jo liye KhaDe the paTThar voh galey lagaa ke roye
Khaksaar
Praveen