Ik jawaab chahta hoon.

[Aadii]

Main Ik jawab chahta hoon
Unginnat sawaloon ka
Beyshumaar logoon kee
Beyshumaar ankhoon ka
Main zubaan chahta hoon
Apnay hi khayaloon kee
Bebas-o-bekas soch ka
In muztarib nigahoon ka
Main saya chahta hoon
Aasmaan kee iss wussat ka
Ya iss dhoop main jaltey huay
In undaikhay sookhtay pairoon ka
Main bhaag jana chahta hoon
Iss beysaigee aur beymaigee key ehsaas sey
Mujhey panah dey do
Key main iss panah kee beypanah talash main
Kho jana chahta hoon
Ya phir mujhey bata do
Ke aakhir main kya chahta hoon?
Jab bhi yeh sawaal karta hoon
Apnay aap ko lajawab pata hoon
Kya yeh aik faraib ya dhoka tu nahi?
Ya main is jawab kee talash main
Ik saraab chahta hoon
Kya main waqai apna aap chahta hoon?
Ya shaid
Phir issi dhoop talay
Hamesha key liye
So jana chahta hoon
Main issi sawaal kee talash main
Ik jawaab chahta hoon.