~*Kuch Kahee An-kahee...*~

[sameer'shaad']

Railgaadi apni raftaar meiN lagaataar izaafa kartii jaa rahi thi, aur main Premchand ki Nirmala me sar diye baithaa thaa... Soch rahaa thaa Naari kitni mahaan hai, kitni kartawya parayaan hai, apna sab kuch kisi ke charno me nyochaawar karne waali koi Devi hi ho saktii hai...

Khair jaise taise sochte vichaarte main apnaa samay kaaTne me vyast thaa.... Patni ji shaayad apne mobile me koi game khel rahi thiiN, par meri ruchi to shuruaat se hi kitaaboN me hi thii isi liye ghar jaane ka samay main kisi upanyaas ya kathaa kahaani me hi bitaaya kartaa thaa.....

Aaj kareeb 1 sal ke baad main apne Pushtaini ghar jaa raha thaa jahaaN aaj bhi mere Maata Pitaa rehte hain.... rehte kyaa hai ek alag duniyaa hai unki , poorn anushashan yukt.. Mere Pitaaji ek behad siddhantwaadi insaan haiN, aur maata ji unke anushashan ko paalan karne me sadaa tatpar rehtiiN, dono ki sabse acchi baat ye hai ke dono sarkaari daftar me padasth hain aur isi ke saath saath ghar ki saari zimmedaari bhi akele uThaae hue haiN..

College ki degree lene ke baad, naukri ke chakkar me Pune aa gaya thaa aur pichle 4 saaloN se yahiN reh gaya hoon.... Aur pichle hi saal shaadi ki Dorr me bhi bandh chukaa hooN.. Ab main aur patni ji Pune me rehte hain aur is baar Eid ki chuttiyoN me ghar jaa rahe hain apne maata pitaa ke saath tyohaar manaane....

Khair ye kahaani ko jis uddeshya se maine badhaane ki koshish ki hai wo in sab zindgee ki kashmakash se bahot door ki kahaani hai.... kahaani hai us waqt ki jab na to internet, phones, mobile ka itnaa shouq logon ko huaa kartaa thaa aur na hi log kaalpnik duniyaa me khoe rehte they jaise ke ab hamaari Patni ji aur na jaane unke jaise kitne hi log khoe rehte haiN.... us maadhyam se jise hum Mobile, tablets , laptops ya kuch bhi keh leN....

Us waqt to bas insaan, insaan me hi khoyaa rehtaa thaa, log jahaan apne kaam kaaj me, apne daftaroN me aur uske aas paas ke logon ke sath zyada se zyaada waqt bitaaya karte they, wahin bacche chuttiyoN me zyaadatar waqt apne Naana naani ke yahaan bitaane me yaqeen rakhte they , aur saal bhar intzaar kiyaa karte they ke kab chuttiyaaN aayengi aur kab wo daud padenge un galiyoN me jahaaN unka bachpan apni amiT chaap chhodne waala hai.......

Kahaani ko jald aage badhaauNga.. Filhaall koi station aaya hai shaayad aur patni ji ne Chaay ki farmaaish kar di hai...... jald aata hoon paathakoN kahin jaaiyega nahi.....

aapka

Shaad....