aadaab dosto
ek bohat puraani Ghazal aur kuch GhazleN jo abhi shuruu ki haiN unke kuch tanha ash'aar post kar raha huuN ummiid hai aapko qaabil e ga'ur lageNgey
mulaiizaa kijiye :-
haal-e-dil aap ko sunaanaa thaa
she'r kahnaa to ik bahaanaa thaa
Khaab mujh ko dikhaaye kyuuN tuuney
dil agar toD ke hii jaanaa thaa
is liye KhilwatoN meiN maiN royaa
kyuNkey mehfil meiN muskuraanaa thaa
dushmanoN ne diyaa naa gar dhokaa
jaa ke yaaroN ko aazmaanaa thaa!
ham ne tabh bhii wafaayeiN kii "maikash"
bewafaaoN kaa jab zamaanaa thaa
.................................................. .............
kuch duniya ke zulm-o-sitam ne, tuufaan uthaa rakha hai
kuch teri tammannaoN ne, deewaana banaa rakha hai
vaada yeh na mujhse maaNgo, maiN tumko bhulaa duuN jaanaaN
kahiiN phool ne bhi khushbu ko, apne se judaa rakha hai
.................................................. ...............
vo ladki kal talaq jo tarq-e-ta'lluq se bahut khush thi
na jaane kyoN lage hai ab bhi hamse pyaar karti hai
.................................................. ...............
bedilii se tishnagii tadpaa rahi hai aaj kal
hadd se ziyada yaad unki aa rahi hai aaj kal
.................................................. ...............
kyoN tamaasha sa banaaya jaaye
dard dil meiN hi chhupaaya jaaye
aaj yaaroN ke beech baithe haiN
mas'alaa dil ka uthaaya jaaye
.................................................. ................
voh khushnaseeb hai jisey tera pataa milaa
humko to raahbar milaa na raasta milaa
dekha hai jisne bhi mera seena TaTol kar
pehlu meiN dil ke dard ka daftar khulaa milaa
.................................................. ................
ab miyaaN in meiN se ko'ii Ghazal kabhi muqammal ho gayi ( jiska chance bohat kam hai
) to zaruur post karuNgaa
apne ta'suraat se nawaziiyega
shukriya
maikash