Quote:
Originally Posted by Pradhyuman
Ahmad bhai..
achi koshish hai...aapka radeef acha hai..aur aapke vichaar bhi (matlab jo kehnaa chaah rahe ho..magar saaf nahi).ek baat bataana chaahta hun..jitna mujhe ilm hai..waise zyaada kuch hai nahi kehne ko bas itna ki..
aapka radeef hai "aise tu hum ko day maulaa" to aapne matle meiN "ko lay maulaa" likha hai jo technically galat hai..ek aur jagah bhi galti ki hai.."aisi na hum ko..."
bhai meri koi baat ka buraa mat lagaana..mera maqsad aapse aur achi ghazal likhwaana hai..god bless u..aage bhi aapko padhna chahunga..
gar kuch na pasand aaya ho to mauf kar dijiyega
aapka dost,
Pradhyuman
|
Tasleemaat Janaab Pradhyuman Sahab!
Bhaee sabsay pahlay aapka dilee shukriaa. Wujoohaat kaee hayn iski(yaani shukriya kee).
Pahlee kee aap nay is nacheez kay kalaam par nazr_e_inayat farmaayi, doojee kay aap nay 'waqt' jo aajkal kay zamanay mayn anmol shaey hai, usay ataa kiya mayree is adna see koshish par. Phir sonay per suhaaga aapnay apni raaye ataa kee aur chamchamatee huee roshnee_e_ilm hamaray kalaam per daali jissay saaray andhayray koanay saaf numayan hogayay hayn.
Do teen cheezayn apni mayn aapkay saamnay rakhna chahoonga.....
Nuqta numbar ek.
Ye meri pahli kavish hay aur haqeeqatan yay koi ghazal nahee hay bas ek duaa ba_shakl ghazal hai.
NuqtaNumbar Do.
Hidaayat amal kee tu hamko day Maula,
Nazdeek apnay tu hamko lay Maula!
Mujhay nishaandayhee kejay pahlay shayr mayn bayaani kahaan saaf nahee hai.
Mera matlab is shayr mayn yahi hai kee
Ya rab hamayn amal (nayk a'maal) kee hidaayat day..(amal is liyay kee baatein to nayki kee sab_hee kartay hayn laykin jab uspar amal ki baat aatee hai tab aksar loag peechay hath jaatay hayn).
Nazdeek apnay tu hamko lay Maula say muraad yay kee Ya Rab apnay qareeb lay taa kee ham mahfooz rahayn aur terii rahmatoan kay saayay mayn aajaaen.
Nuqta numbar teen.
Adaavat kisee say na ham karnay paayaen,
Sharaafat AYSEE tu hamko day Maula!
Qibla hamnay aysa hargiz nahee kahaa kay shareef loag adavat nahee kar saktay...bas Rabb_e_Kareem say 'aysee' sharaafat kee iltejaa kee hai jisskay fazl say ham kisee say bhee adaavat na karnay paaen.
Nuqta numbar Chaar.
Himaaqat mayn joothi jo khudko mitaaye,
Halaakat aysee na hamko day Maulaa!
Yahaan bas itnee duaa hai Rab say kee hamayn aysee halaakat say mahfooz rakh jismay ham joothi himaaqat mayn aakar khudko fanaa karlayn. Yaani hamayn ana, mayn, takabbur wa gharoor in cheezon say mahfooz rakh. Yahaan mayn maanta hoon shayad mera yay shayr saaf bayaani se bohat door raha ho. Par har shaqs ka nazariya mukhtalif hota hai aur yay hargiz zaroori nahee kay jo mayn ya koee aur daykh raha ho wahi sab_hee ko nazar aata ho.
Nuqta numbar Paanch.
Salaamat rahayn hamsay phool aur kaantay,
Nazaakat aysee tu hamko day Maulaa!
Yahaan aap nay bajaa farmaaya..bayshak kaantaon ko nazaakat ki koee zaroorat nahee..
Ham aapki raay ko tasleem kartay huay apnay shayr kay kantaon ko kaliyon mayn tabdeel kar daytay hayn.
Salaamat rahayn hamsay phool aur kaliyaan,
Nazaakat aysee tu hamko day Maulaa!
Nuqta numbar Chaye.
Jahaalat hamaree sabhee doo karday,
Bashaarat aysee tou hamko day Maulaa!
Yahan Rab say yahee duaa hai kee hamayn aysee bashaarat( Vision, it also means Glad tiding or good news) say nawaaz jo hamaaree tmamaam jahaalat( laa ilmi) ko door karday. Shaayad ham nakaam rahay yay baat safayee say bayaan karnay mayn.
Bahr haal Janaab Pradhyuman Sahab, ham aap kay mamnoon hayn. Behad khushee huee jo aap nay bilaa jhijak hamayn apni rahnumaai say nawaaza. Aap hamayn apni friend list mayn add karlayn agar munaasib samjhayn tou, khaaksaar ko buhat khushee hogee.
Mujhe pataa thaa mera jawaab kafee wasee hoga aur iskay liyay mujhay sahee waqt nahee mil sakaa, yahee wajeh hai takheer_e_jawaab kee. Duaa hai Rab say kee aap nay is takheer ka bura nahee maana ho.
Khuda_e_paak say duaa hai aapkay ilm mayn aur bhi barkat ataa farmaayay aur wo aapko khush o abaad rakhay!
Thanks
Ahmad