Tum meri ankh k tewar na bhula paoge
Un Kahi bat ko samjho ge to yad aaon ga
Hum ne khushiyon ki tarah dukh bhi ikkathe dekhe
Safah-e-zeest ko palto ge to yad aaon ga
Isi andaz mein hote the mukhatib mujh se
Khat kisi aur ko likho ge to yad aaon ga
Sard raton k mahkate hue sannaton mein
Jab kisi phool ko chumo ge to yad aaon ga
Ab tere ashk main honthon se chura leta hon
Hath se khud inhen phoncho gey to yad aaon ga
Shaal pehnayega ab kon Decembar mein tumhe
Barishon mein kabhi bheego ge to yad aaon ga
Aj tum Mehfil-e-yaran pe ho magroor boht
Jab kabhi toot k bikhro ge to yaad aaon ga
Hadse ayenge jewan mein to tum ho k nidhal
Kisi dewaar ko thamo ge to yad aaon ga
Is mein shamil hai meri bakht ki tareeki bhi
Tum siyah rang jo pahnoge to yad aaon ga
Poet: Wassi Shah