Ahimsa Ka Nirjhar...

[sushiljain]

Jo kisi praani ko maare, woh shaitaan hai insaan nahi.
Mare hue ko khaye kyu? yeh pet hai shamshaan nahi.

Jo kaanta koi chubh jaaye, tadapta huaa tu chillaye,
kaate tu talwaaro se, kyu cheekh na unki sun paaye.
Dard unhe bhi hota hai, ve jeevit hai bejaan nahi...
jo kisi praani ko maare, woh shaitaan hai insaan nahi...

Har ek ki apni satta hai, sabka apna apna wajood hai,
Sab hai jeete apne liye, kisi aur ke liye nahi maujood hai.
Sabhi ko jaaya hai usne, kaun yahaan prabhu santaan nahi...
jo kisi praani ko maare, woh shaitaan hai insaan nahi...

Har dharma mein har mazhab mein, bible geeta kuraan mein,
Ek hai aatma, ek hi rooh, har pashu mein insaan mein.
Ahinsa ka nirjhar sabme, hinsa ka naam-o-nishaan nahi...
jo kisi praani ko maare, woh shaitaan hai insaan nahi...

Buddh kahe, Raam kahe, Gandhi paigambar Peer kahe,
Jiyo aur jeene do yehi, Naanak aur Mahaveer kahe.
Abhay do har praani ko, abhay sa koi daan nahi...
jo kisi praani ko maare, woh shaitaan hai insaan nahi...