tum wahaaN tak aa to jaa'o..

[B.G.M.]

Janaab "Qaabil" Ajmeri ki ik mash'huur Ghazal
aap dostoN ki Khidmat meN Haazir kar rahaa huuN.
Ummiid hai pasand aayegi.

------------------------------------------------------------------------

Ghazal

HairatoN ke silsilay soz-o-nihaaN tak aa gaye
ham nazar tak chaahte thay, tum to JaaN tak aa gaye!

naa-muraadii apni qismat, gumrahii apnaa naseeb
kaarvaaN ki Khair ho, ham kaarvaaN tak aa gaye

un ki palkoN pe sitaare, apne honToN par haNsee
qissah-e-Gham kehte kehte ham kahaaN tak aa gaye!

apni apni justajuu hai, apna apnaa shauq hai
tum haNsii tak bhi nah pahuNche, ham fugaaN tak aa gaye!

zulf meN Khushbuu nah thee yaa, rang aariz meN nah thaa
aap kis ki aarzuu meN gulsitaaN tak aa gaye?!

raftah raftah rang laayaa jazbah-e-Khaamosh ‘Ishq
woh taGhaaful karte karte imtiHaaN tak aa gaye

Khud tumheN Khaak-e-gareebaaN kaa sha’uur aa jaayegaa
tum wahaaN tak aa to jaa’o, ham jahaaN tak aa gaye!

aaj :Qaabil:, maikade meN inqilaab aane ko hai
ahl-e-dil andeshah-e-suud-o-ziyaaN tak aa gaye!


~”Qaabil" Ajmeri

============================================

[Madhu 14]

Ek baar fir bahut khhobsurat sharing BGM ji....

.un ki palkoN pe sitaare, apne honToN par haNsee
qissah-e-Gham kehte kehte ham kahaaN tak aa gaye!

apni apni justajuu hai, apna apnaa shauq hai
tum haNsii tak bhi nah pahuNche, ham fugaaN tak aa gaye!

Dil ko chhoo gaye ye sher...

[B.G.M.]

In the first line
it should read,

"HairatoN ke silsilay soz-e-nihaaN tak aa gaye"

I still do knot know how to "edit " the post