shart hum zindagi se haar gaye -
16th July 2020, 10:07 AM
shart hum zindagi se haar gaye
kaat ke umr qarz utaar gaye
muskuraane ka to qaraar na tha
waqt jo tay hua guzaar gaye
qasr-e-shahi hameN haraata kya
ghar ke saude ki “chit” se haar gaye
thi na duniya saNwarne ke qaabil
hum bas apni nazar saNwaar gaye
rahnuma tum dikha rahe jo maqaam
hum to kab ka haiN us ko paar gaye
us meiN kya kya hua khabar bhi hai
jis gali se ho baar baar gaye
jab se manzil ko taakna chhorha
raaste ke bahaut se khaar gaye
waqt ki bakhshisheN sametne meiN
mere daaman ke saare taar gaye
kab wo mera tha kab maiN us ka tha
phir bhi dukh tha jab ikhtiyaar gaye
darmiyaaN kuchh sukooN bhi tha lekin
beqaraar aaye beqaraar gaye
marg-e-“zarraa” ko raaz hi rakhna
gam ke maaroN ke gamgusaar gaye
- zarraa
maiN rehnuma ke kahe raastoN se door raha
mera maqaam sada manziloN se door raha
|