yooN bhee ham ko voh aazmaa'eN ge - by Sarwar Alam Raz Sarwar -
7th August 2006, 03:45 AM
yooN bhee ham ko voh aazmaa'eN ge
:kyaa Khabar thee voh bhool jaa'eN ge:
Gham uThaa'eN ge, muskuraa'eN ge
aap ko aa'eena dikhaa'eN ge
iss taraH jaise baat ko'ee naheeN
jaan kar bhee fareb khaa'eN ge
haaN! karo sang.saar tum lekin
itne patthar kahaaN se aa'eN ge?
laakh dunyaa meiN ghoom aa'eN ham
tujh saa ko'ee kahaaN se laa'eN ge?
Khud.shanaasee Khudaa.shanaasee hai!
uss ko ham yooN hee DhooND laa'eN ge
dekhnaa aik roz paanee meiN
aag naaley mire lagaa'eN ge
keejiye ab Khudaa Khudaa :Sarwar:
aap kiss kiss ke Gham uThaa'eN ge?
|