Din Ka Chaand

[noor_noor]

Ek azaad nazm munfarid khyaal ke saath aap logoN ki khidmat mai paish hai apni raaye se nawaaziyega


Din ka chaand

Kitni yaksaaniyat hai mujh mai
Aur tujhme
Ey din ke chaand
Ke mere saath
jo haiN wo haiN hi nahi
Jo din ki roshni mai
tere saathiyoN ki tarhaN
mujhko bhi
akela choD dia karte haiN
aur meiN bhi
teri tarhaaN
raat hone ke intezaar mai
suraj ki tapish ko
apne wajood mai
paiswast hota
mehsoos karta rehta huN
meiN jaanta huN tere dard ko
teri khaamoshi
tere chehre pe tanhaaii ke saaye
jiske ehsaas mai tu
til til
ghat_ta hua nazar aata hai
meiN sab jaanta huN “chaand”
ke teri tarhaN
meiN bhi tanha huN



aslam