ek Ghazal....''Zaheer'' Kashkiiri sahab kii

[balvinder]

loh-e-mazaar dekh ke jii daNg rah gayaa
har ek sir ke saath faqat saNg rah gayaa

badnaam ho ke ishq meN ham surKhroo hue
achchha huaa ki naam gayaa, naNg rah gayaa

hotii na hamko saaya-e-diivaar kii talaash
daaman-e-husn-e-yaar bahut taNg rah gayaa

seerat na ho to aariz-o-ruKhsaar sab Ghalat
Khushboo uRhii to phool faqat raNg rah gayaa

kul kaaynaat fiqr se aazaad ho gayii
insaaN misaal-e-dast-e-tihii saNg rah gayaa

kitne hii inqilaab shikan dar shikan mile
aaj apnii shakl dekh ke maiN daNg rah gayaa

apne gale meN apnii hii baahoN ko Daaliye
jeene ka ab to ek yahii DhaNg rah gayaa

ham unkii bazm-e-naaz meN yooN chup hue ''Zaheer''
jis tarah ghaT ke saaz meN aahaNg rah gayaa

''Zaheer'' Kashkiiri