Samina Raja,10 Love Poems From Shehr-e-Saba

zainhasan · **Samina Raja,10 Love Poems From Shehr-e-Saba -** 23rd January 2009, 05:00 AM

TERA NAAM

Tera naam din kay zewal parr,meri roshni
Tera naam shaam-e-safar, sitara-e-rehbari
Tera naam shehr-e-malal mein,kaff-e-dosti
Tera naam,meri mataa-e-jan,meri sha'eyri

Mujhay harr para'o pe chahi'ay,
teri hammdami

zainhasan · **Samina Raja -** 23rd January 2009, 05:03 AM

TERAY DHYAN MEIN

Ga'ei raat bhi, roaz ki tarah
main bass teray dhyan mein
so ga'ei thi
ajab khwab mein kho ga'ei thi

buhat door chalta huwa rasta
aik jangal mein ja karr
kahien rukk gaya tha,
sitaron bhara aasman
iss zamien ki taraf jhukk gaya tha!

zainhasan · **Samina Raja -** 23rd January 2009, 05:05 AM

PIYA BAAJ PYALA PIYA JA'AY NA

Mujhay aisi doori ki aadat nahin thi
ke jo zindgi ki ragon say
jawan khoon ki
aakhri boond takk khainch lay,
jism ka khaet banjar karay,

iss li'ay jabb say too
uss safar parr gaya
main nay aaiyna dekha nahin,
saari dunya say
aur aasman takk say parda kiya,

main nay sardi mein dhoop
aur garmi mein sa'ay ki parwa na ki,
zindgi ko na samjha kabhi zindgi,
aad'tann saans li!

bhook to marr ga'ei thi
juda'ei ki pehli hi sa'att mein
lekin abhi pyaas baaqi hai
aur aisi zalim, ke meray badan parr
babool ugg rahay hain,
zuban parr bhi kantay paray hain,

mujhay aisi doori ki aadat nahin hai
ke jo mot aur zindgi mein
ko'ei farq rehnay na day
phirr bhi yeh jaan lay---
garr mujhay chashma e aab e hewan
bhi mill ja'ay--- ikk boond
teray bina, mujh pe ja'yez nahin!

zainhasan · **Samina Raja -** 23rd January 2009, 05:06 AM

TERAY GHAMM KA JAMAL

Aik khushboo si ko'ei
teray shabistan say chali aati hai,
roshni bann kay---
kabhi moj-e-hawa ki soorat,

yeh gumaan hota hai
phela hai meray jism pay
neendon ki tarah---tera khayal,
phool khiltay hain
meray khwab say bahar bhi kahin

dill say aankhon talak aata hai
teray ghamm ka jamal

zainhasan · **Samina Raja -** 23rd January 2009, 05:08 AM

SAFAR

Main siyah raat kay safar parr hoon
aik qendeel yaad-e-janan ki
hath mein hai,magar hawa hai taez

main to ik baat kay safar parr hoon
jo kisi kunnj-e-labb say phooti thi
aur meri tamam umr ko--- aik
dasht-e-pur khaar mein dhakael ga'ei

saari subhein,usi kay naam huein
saari fathein,usi kay naam huein
main,faqat maat kay safar parr hoon
main to ik baat kay safar parr hoon!

zainhasan · **Samina Raja -** 23rd January 2009, 05:09 AM

AASMAN!KABB AA'O GAY?

Aasman!
main tumharay ishq mein faqeer hoon
magar tumhari wus'aton kay samnay
haqeer hoon,
tumm aa'o gay
ke main uraan karr kay aa'oon
badlon ko cheer karr?

main kaisay aa'oon
kaisay toar doon tilism-e-khak ko
ke jiss ki main aseer hoon?

ke aik musht-e-khak ki
reha'ei---khakdan say
ik khayal hai,mahal hai,
magar yeh ishq bhi
jahan kay wastay misal hai
isi liay tumm aa'o gay!

main aab deeda,ghamm gazeeda,
muntazir hoon
Aasman! kabb utar kay
meray dill mein aa'o gay?

zainhasan · **Samina Raja -** 23rd January 2009, 05:11 AM

PYAAS

Mujhay pyaas lagi thi zoron ki
aur jhulas ga'ay meray pa'on
uss garmi aisi dhoop pari thi
jall gaya saara ga'on

sabb naddi nalay siikh ga'ay
aur khaet huway weeran
aangan aangan mein dhool uri
bazaar huway sunsaan

main tann kay duwaray baetth rahi
aur meray mann mein laag
phir aik musafir aa nikla
matt poochho meray bhaag

uss chehray parr bari komalta
unn aankhon mein bari preet
unn sanwlay sanwlay haoton parr
kabhi bait hannsay kabhi geet

mujhay pyaas lagi hai zoron ki
aur nahin hai ko'ei aas
main uss say keh nahin pa'oon gi
''mujhay teray labon ki pyaas''

zainhasan · **Samina Raja -** 23rd January 2009, 05:12 AM

ABB MERA PYAAS PAYALA

Kaisa pyaas payala lay karr
amret kay ik ghoont ki khatir
ghoomtay phirtay---
meri raah mein aa jatay ho,
meray khali pann ko daekh kay
hanns partay ho,

dhoop say thoara chandann lay karr
apnay hoton say chhoo karr
meri aankhon mein rakhkh detay ho

raat kay mann say kalak lay karr
tumm apni aankhon say laga karr
meray khwab mein dharr detay ho,

apnay dill ki betabi ko
kuchh lafzon say-kuchh baton say
meray dill mein bharr detay ho,

tumm barish ka meetha paani
khud chakhtay ho---
aur apna woh pyaas payala,baaqi umr ko
meray hath thuma jatay ho!

zainhasan · **Samina Raja -** 23rd January 2009, 05:14 AM

WOH SHAAM ZARA SI GEHRI THI

In hijr zada aur ranjeeda
aankhon say zara neechay jhukk karr
teri yaad mein bheegay rukhsaron kay
zard kinaron parr aa karr
ghabra'ei huei si utri thi
aur thori daer ko thehri thi

abb yaad nahin,teri aankhon mein
ko'ei khwab tha-koei sitara tha
teray honton ki unn qoson parr
ko'ei lafz tha -ko'ei ishara tha

kya shaam kay rastay parr rukk karr
teray dill nay mujhay pukara tha?

bass yaad hai itna,jabb dill nay
iss umr ki hadd say kuchh peechhay
ik baar palat karr dekha tha---

raston pay khilay sabb phoolon parr
ik abr ka saya jhukta tha
aur shaam zara si gehri thi!

zainhasan · **Samina Raja -** 23rd January 2009, 05:16 AM

KHWAB MUSAFIR

Khwab musafir!
kis manzil ki khwahish mein tumm
chupp nazron say, rasta rasta,
meray peechhay bhagtay ho
tumm soatay ho ya jaagtay ho?

kaisay haray haray lafzon ka
gehra jaal buna hai tumm nay,
jiss mein meri chahat ka
nao ranng parinda phansna hai
aur ummidon ki deewar say
meray dill mein jhankna hai

apnay khwab ki manzil takk janay kay liay
tumm meri khwahish kay pull parr
chalna chaho---yeh namumkin hai

main to khud, khwab aur khahish kay
beechon beech---
atakti hoon aur roati hoon,
janay kitnay hi janamon say---
aadhi neendein soati hoon!