zindagi se hooN bad-gumaaN kaafi

[zarraa]

zindagi se hooN bad-gumaaN* kaafi
par abhi to hua kahaaN kaafi

maiN hooN bhatka yahaaN wahaaN kaafi
tum ne chhorhe bhi haiN nishaaN kaafi

meri kismat meiN aashiyaaN kitne
bijliyaaN mujh pe mehrbaaN kaafi

ek sehra-e-tishngi* hooN maiN
ek maykhaana hai kahaaN kaafi

mujh ko mas* karna hai khayaaloN ko
hai n alfaaz ka bayaaN kaafi

taNg* hai meri wus’atoN* ke liye
ho tumhaare liye jahaaN kaafi

meri aaNkheiN kuchh aur dhooNdh raheeN
warna dilkash hai ye samaaN kaafi

hum n un meiN haiN jaan lete par
tum ne rak’khe haiN raazdaaN kaafi

ibteda* ka n gham n hashr* ka khauf
aafateiN in ke darmiyaaN* kaafi

aag chaaheiN chhupa ke rak’khi ho
dikh raha har taraf dhuaaN kaafi

is ko pardhna raha tha naa-mumkin
teri “zarraa” ye daastaaN kaafi

- zarraa

*
bad-gumaaN = suspicious
sehra-e-tishnagi = desert of thirst
taNg = narrow
wus’atoN = expanses
mas = touch
ibteda = beginning
hashr = end
darmiyaaN = in between