ek Ghazal....''Jamal'' Panipati sahab kii

[balvinder]

jaane kyaa hogaa har ik dil ko ye dhaRhka kyaa hai?
door tak phailaa huaa Khauf kaa saayaa kyaa hai?

bahar-o-bar vaadii-e-saharaa meN hai halchal kaisii?
ye ufuq-ta-b-ufuq shor-saa barpaa kyaa hai?

bain kartii hu_ii chaltii hai hawaa kyoN sar-e-shaam?
dil kaa maaraa ko_ii raatoN ko sisaktaa kyaa hai?

kyaa hai ye soz-e-darooN jis se sulagtaa hai badan?
jo baRhaktaa hai dil-o-jaaN meN vo sholaa kyaa hai?

dam-b-dam uThatii haiN kis yaad kii lahreiN dil meN?
dard rah-rah ke ye karvaT-sii badaltaa kyaa hai?

kaisii talKhii hai ki nas-nas meN basii jaatii hai
zahar-sa ko_ii rag-o-pai meN utartaa kyaa hai?

bujh gayii shamm-e-nazar jab vo chehraa chamka
dil jo Dooba to ab chaaNd-saa niklaa kyaa hai?

''Jamal'' Panipati