Zinda Yaa Murda?

[Star]

aik aur story hamari urdu ki kitaab mai di hooi thi yeh aik folk story hai jo log aik dooserey ko gahon mai sunaatey hain

aik gahon mai akbar naam ka aik banda rehta tha, jis ki bohot saari saari zameen thi. bachpan mai us key waaldain chal basey they (parents died), wo bohot naik aadmi tha gahon key har kaam mai shaamil hota tha, aur apni zamino ka khayal aik baap ki tarah rakhta tha.

phir us ki shaadi ho gayi, ab ziada tawajo apni zamin ko naa dey paata tha jis ki wajah sey usey aik nokar rakhna para, phir garmiyon key mosam mai jab *****m(wheat) ki kataahi kaa time aaya to akbar aur us kaa nokar raat bhar apney khaiton(farms) mai rehtey they kiyoon key kataahi ho chuki thi aur wo log apni fasal(wheat) ki hifazat kartey they.

aik shaam ko akbar kaa aik cousin us key gahon aaya aur seedha farms mai hi akbar key pass chala aaya aur kaha key kal us key barey bhai ki shaadi hai aur wo yeh paigham akbar key liye deney aaya hai, akbar ney kaha theek hai, aur phir nokar ko kehney laga dekhaa jab raat ko meri biwi khaana deney aahey to usey naa batana key mai shaadi mai gaya hooa hoon mai subha jaldi hi aa jahoon gaa.

yeh key kar akbar apney cousin key saath chala gaya, ab peechey nokar reh gaya akbar ki biwi aayi aur khaana dey kar chali gayi. ab raat ko nokar huqa pee rha tha key aik chingaari(flame) uri aur seedhi kati hooi wheat key ooper jaa para jis sey aik dam hi aag lag gayinokar aag bhujaaney barha to khud bhi jal gaya.

[Star]

subha akbar ki biwi khaana ley kar aayi aur dekhaa key fasal jal chuki hai aur aik laash bhi jali pari hai us ney socha akbar jal key mar gaya hai, ab hooa yeh key akbar shaadi mai late ho gaya, idher us ki biwi roti hooi sab ko bataaney chal pari, log aahey nokar ki laash ko akbar ki laash samajh kar dafnaa diya.

shaam ko hamarey akbar sahab ghar tashreef laahey to dekhaa key us ki biwi ooncha ooncha ro rhi hai ab us ki biwi ney us ko dekhaa to zor ki cheekh maari aur shor daal diya key dekho dekho akbar ki roh mujhey leney aahi hai. gahon key logon ney dandey(sticks) aur jis key haath jo laga wahi uthaa key akbar key peechey bhaagey, akbar bechaara bhaagta bhaagta aik grave yard mai jaa chupaa.

wo dil mai sochney laga key ho sakta hai andairey mai us ki biwi ney usey nahi pehchaana to subha wo zaroor pehchaan ley gi, subha subha akbar sahab masjid ki taraf chal parey wahan mulaah ko dekhaa jo abhi azaan deney ki tayyari kar rha tha usey kaha oh mullah mai bhooka hoon mujhey kuch khaaney ko do, mullah ney akbar ko dekha to socha yeh phir zinda ho gaya hai yeh sochtey hi mullah to neechey gir gaya aur darr key maarey bechaara mar gaya.

akbar phir grave yard lot aaya, phir din ko us ney dekhaa key kuch log kisi kaa jinaazaa (funeral) ley kar aa rahey they wo mullah kaa jinaaza tha grave yard mai pohonchney key baad logon ney aapas mai khajoorain(dates ) baantana shoroo kar di key aik taraf sey unhey aawaaz aahi " sab sey pehley mera hisaa mujhey do" unhon ney dekhaa to akbar khara tha

[Star]

phir to sab log cheekhtey(screaming) hooey aisey bhaagey key kisi key jootey, kisi ki topi hataakey wo log saari khajoorain(dates) bhi wahi chor gaye aur mullah ki laash bhi wahi chor gaye. akbar mazey sey chalta hooa aaya khajoorain khaahi aur mullah ko dafna(buried) diya

Raat ko jab akbar gehri sochon mai tha key us key gahon waley us sey itna kiyoon dartey hain us ney socha subha wo laazmi kuch karey gaa subhaa us ney dekhaa aik gadha gaari aa rhi thi akbar us key saamney aa gaya gadha gaari waala roti khaata hooa a rha tha us ney sab kuch wahi choraa aur gadhaa gari sey chalaang laga kar bhaag khara hooa, gahon jaa kar us ney sab logon ko ikhatakiya aur bataya key yeh yeh hooa hai

ab poorey gahon waley pata nahi kiya kiya utha kar grave yard ki taraf aahey kisi key hath mai axe hai aur kisi key haath mai danda. akbar ney door sey unhey dekh kar bhaagna shoroo kar diya aur seedha apney us cousin key pass jaa pohonchaa jis ki shaadi pey gaya tha, phir us key cousin akbar key saath gahon aahey aur logon ko bataya key yeh akbar hi hai, phir logon ney bataya key is is tarah unhon ney to is ko dafna diya tha phir akbar key cousins ney unhey bataya key wo laash to nokar ki thi aur akbar us din shaadi pey tha,
tab jaa key akbar ki jaan chooti