Salaam!!
Ek purani ghazal islaah ke baad yahaN pesh kar rahi hooN!!Umeed hai aap logoN ko pasand aayegi..apni ray dena na bhooliyega...Shukriya!!
rukh-e-raushan ko aanchal meiN chhupaaye kaun baitha hai
are mahtaab par baadal uRhaaye kaun baiThaa hai
milaa hai chain barsoN baad ye kis kii tamannaa se
ye haathoN ko duaooN meiN uThaaye kaun baitha hai
duaeiN meray jeenay ki na jaanay kaun karta hai
merii marne kii khaahish ko bhulaaye kaun baitha hai
bachakar apni nazroN ko guzar jaatay thay sab pahlay
inhi nazroN se ab nazreiN milaaye kaun baitha hai
taras khaayaa hai tanhaaii pe merii aaj ye kis ne
ye merii raah meN aaNkheN bichhaye kaun baiThaa hai
ye kis kii anjuman hai, jo mujhe apnii sii lagtii hai
'Shumaila' ke liye mahfil sajaaye kaun baiThaa hai
--shumaila