dhalegee shayari mein ....

Feroz · **dhalegee shayari mein .... -** 25th May 2008, 03:01 AM

dosto, aap mein se zyadatar log mujh ko nahin jaantey hongey, is site par barson pahley aaya karta thaa, shaayed mere azeez dost 'maikash' aaj bhii yahan par aatey hongey... khair.. "idhar se guzraa thaa sochaa salaam karta chaloon" ... chand ash'aar aap kee nazr hain ..

-----------------------------------------------------
dhalegi shayari mein gham kee shiddat kaam aayegi
lagega sood is pe, aur ye daulat kaam aayegi

utha kar khaak sar mein daalney mein hogi aasaani
tere koochey mein sajdey kee riwayat kaam aayegi

mere dil ko kisi ke rahney ke qaabil nahin chchodaa
bata ab kis ke ye ujdi imarat kaam aayegi

wafa le ja, dua le ja, mera sab kuchch uthaa le ja
koi to shai tere waqt e zaroorat kaam aayegi..

maafi chahta hoon, poori ghazal yaad nahin .. phir kabhi sahii...

Feroz
ferozgill@shaw.ca

maikasH · 04:30 AM

ustaad-e-muhtarim feroz saaheb

sat shri akaal

ummiid hai ke parivaar meiN sab khai'riiyat se hoNge, gudiya kaisi hai ? ab to shayad teen saal ki ho gayi hogi

aapko yahaaN dekh kar mera khushi ka thikaana nahiiN hai, "ikhtilafaat" to maiN taqreeban roz hi paDhtaa huuN lekin aapki koi taaza Ghazal paDhe ka'ii saal ho chale.

yeh aapki faraakh'dilee hai jo mujhe aapne aaj bhi apne dostoN meiN shumaar rakha hai vagarnaa mujhse behtar yeh ko'ii nahiiN jaan'ta ke aapka haath mujh na'ehl ke sar par na hota to maiN aaj bhi urdu adab ki baariiqiiyoN se koso'N duur hota

yeh shayri.com ki khush'naseebi hai ke ek muddat baad aap jaise saahib-e-ilm ke qadam yahaaN paDe haiN !

aapke jaane ke baad kuch arsaa to maine ba-hauNslaa urdu adab ki muKhtalif online mehfiloN meiN shirkat ki lekin waqt aur haalaat ne kuch yuuN karvaT li ke le-de kar bas yahi ek mehfil bach'ii hai jahaaN ke gaahe-ba-gaahe aane ka waqt bhi mushkil se milaa, kuch mahine pehle ta'i kiya tha ke do-ek saal ke liye sukhan'fehmii se "retirement" le li jaaye lekin vo bhi mumkin na hua, kehte haiN ke "chor chori se jaaye, hera-pheri se na jaaye"

aapki yeh Ghazal "mere kaam" ki hai

, Ghazal paDhte hue mujhe "ikhtilafaat" ke pehle kuch panne'y yaad aa gaye

apne khaadim ki daad qabuul kijiye, mujhe hadd se z'yaada khushii hai ke aap yahaaN tash'reef laaye aur is mehfil ko aapne is khoobsuurat qalaam se nawaaza

maiN agle maah 9 saal baad pehli baar watan lauT raha huuN, waapis aa kar aapko UK aane ki daavat dene ka iraada hai, ummiid hai ke aapse mulaqaat zaroor hogi

choTi ko mera pyaar dijiyega

rab raakha
maikash

chaahat · 25th May 2008, 10:23 AM

Quote:

Originally Posted by Feroz

dosto, aap mein se zyadatar log mujh ko nahin jaantey hongey, is site par barson pahley aaya karta thaa, shaayed mere azeez dost 'maikash' aaj bhii yahan par aatey hongey... khair.. "idhar se guzraa thaa sochaa salaam karta chaloon" ... chand ash'aar aap kee nazr hain ..

-----------------------------------------------------
dhalegi shayari mein gham kee shiddat kaam aayegi
lagega sood is pe, aur ye daulat kaam aayegi

utha kar khaak sar mein daalney mein hogi aasaani
tere koochey mein sajdey kee riwayat kaam aayegi

mere dil ko kisi ke rahney ke qaabil nahin chchodaa
bata ab kis ke ye ujdi imarat kaam aayegi

wafa le ja, dua le ja, mera sab kuchch uthaa le ja
koi to shai tere waqt e zaroorat kaam aayegi..

maafi chahta hoon, poori ghazal yaad nahin .. phir kabhi sahii...

Feroz
ferozgill@shaw.ca

Feroz ji..

Bahut hi khoobsoorat ghazal likhi hai aapne.... aage ki lines ka intzaar rahega.

Take Care..

~Priya

baagi · 25th May 2008, 01:07 PM

bahu khoob ehsaas,kya baat hai,
mere dil ko kisi ke rahney ke qaabil nahin chchodaa
bata ab kis ke ye ujdi imarat kaam aayegi
bahut khoob..
ummid karta hoon aap aage bhi yahan se gujarte rahenge.pls likhte rahe..