Jaun Eliya........

maikasH · 02:06 AM

Jaun Eliya sahab apni garam-mijaazi ke liye mashahoor the aur aik hadd taq unke mijaaz ki jhalak unke sukhan meN bhi kahiiN-kahiiN dikhati paDti hai........unka she'r kehne ka ek bohat hi alag aNdaaz tha aur mehfil meN she'r padhna meN to unka jawaab hi nahiiN tha.....

meri sab dostoN se guzaarish hai ke unka kalaam yahaaN post kareN :-

shuruvaat ke liye unki kuch Ghazliiyaat post kar raha huuN :-

mula'izaa farmaayeN

1.

aKhlaaq na barteNge mudaaraa na kareNge
ab hum kisii shaKhs kii paravaah na kareNge

kuchh log ka_ii lafz galat bol rahe haiN
isalaah magar ham bhii ab isalaah na kareNge

[isalaah=correction]

kam_go_ii ke ek vasf-e-himaaqat hai bahar to
kam_go_ii ko apanaayeNge chahakaa na kareNge

ab sahal pasaNdii ko banaayeNge vatiiraa
taa der kisii baab meN sochaa na kareNge

Gussaa bhii hai tahaziib-e-ta'lluq kaa talabagaar
ham chhup haiN bahare baiThe haiN Gussaa na kareNge

kal raat bahut guur kiyaa hai so ham ai "Jaun"
tay kar ke uThe haiN ke tamannaa na kareNge

.................................................. ........................

2.

Khud se ham ik nafas hile bhii kahaaN
us ko DhuuNDheN to vo mile bhii kahaaN

Khemaa-Khemaa guzaar le ye shab
subah-dam ye qaafle bhii kahaaN

ab ta'mul na kar dil-e-Khud_kaam
ruuTh le phir ye sil_sile bhii kahaaN

aao aapas meN kuchh gile kar leN
varnaa yuuN hai ke phir gile bhii kahaaN

Khush ho siine kii in KharaashoN par
phir tanaffus ke ye sile bhii kahaaN

.................................................. ...............................

3.

kitane aish uDaate hoNge kitane itaraate hoNge
jaane kaise log vo hoNge jo us ko bhaate hoNge

us kii yaad kii baad-e-sabaa meN aur to kyaa hotaa hogaa
yuuN hii mere baal haiN bikhare aur bikhar jaate hoNge

baNd rahe jin kaa daravaazaa aise gharoN kii mat puuchho
diivaareN gir jaatii hoNgii aaNgan rah jaate hoNge

merii saaNs ukhaDate hii sab baiN kareNge ro'eNge
yaanii mere baad bhii yaanii saaNs liye jaate hoNge

yaaro kuchhh to baat bataa'o us kii qayaamat baahoN kii
vo jo simaTate hoNge in meN vo to mar jaate hoNge

.................................................. .................................

4.

dil ne vafaa ke naam par kaar-e-jafaa nahiiN kiyaa
Khud ko halaak kar liyaa Khud ko fidaa nahiiN kiyaa

kaise kaheN ke tujh ko bhii hamase hai vaastaa koii
tuune to hamase aaj tak koii gilaa nahiiN kiyaa

tuu bhii kisii ke baab meN ahad-shikan ho Gaaliban
maine bhii ek shaKhs kaa qarz adaa nahiiN kiyaa

jo bhii ho tum pe mautariz us ko yahii javaab do
aap bahot shariif haiN aap ne kyaa nahiiN kiyaa

jis ko bhii sheKh-o-shaah ne hukm-e-Khudaa diyaa qaraar
hamane nahiiN kiyaa vo kaam haaN baa-Khudaa nahiiN kiyaa

nisbat-e-ilm hai bahot haakim-e-vaqt ko aziiz
us ne to kaar-e-jehl bhii be-ulaamaa nahiiN kiyaa

.................................................. ........................................

5.

ham to jaise yahaaN ke the hii nahiiN
dhuup the saayabaa.N ke the hii nahiiN

[saayabaa.N = cornice]

raaste kaaravaaN ke saath rahe
marhale kaaravaaN ke the hii nahiiN

[marhale = obstacles/difficulties]

ab hamaaraa makaan kis kaa hai
ham to apane makaaN ke the hii nahiiN

in ko aaNdhi meN hii bikharanaa thaa
baal-o-par yahaaN ke the hii nahiiN

[baal-o-par = arms and wings]

us galii ne ye sun ke sabr kiyaa
jaane vaale yahaaN ke the hii nahiiN

[sabr karanaa = to be patient]

ho terii Khaak-e-aastaaN pe salaam
ham tere aastaaN ke the hii nahiiN

[Khaak = dust; aastaaN = threshold]

.................................................. ............................

6.

sazaa

har baar mere saamane aatii rahii ho tum
har baar tum se mil ke bichhaDataa rahaa huuN maiN
tum kaun ho ye Khud bhii nahiiN jaanatii ho tum
maiN kaun huuN ye Khud bhii nahiiN jaanataa huuN maiN
tum mujh ko jaan kar hii paDii ho aazaab meN
aur is tarah Khud apanii sazaa ban gayaa huuN maiN

[azaab = curse/difficulty]

tum jis zamiin par ho maiN us kaa Khudaa nahiiN
bas sar basar aziiyat-o-aazaar hii raho
bezaar ho gaii ho bahut zindagii se tum
jab bas meN kuchh nahiiN hai to bezaar hii raho
tum ko yahaaN ke saayaa-e-paratau se kyaa Garaz
tum apane haq meN biich kii diivaar hii raho

[aziiyat = difficulty; aazaar = harm/woe; paratau = reflection]

maiN ibtadaa-e-ishq meN bemahar hii rahaa
tum intahaa-e-ishq kaa miyaar hii raho
tum Khuun thuukatii ho ye sun kar Khushii huii
is raNg is adaa meN hii purkaar hii raho

[ibtadaa = beginning; bemahar = without favour]
[intahaa = limit; purakaar = skilled]

maine ye kab kahaa thaa ke muhabbat meN hai najaat
maine ye kab kahaa thaa ke vafadaar hii raho
apanii mataa-e-naaz luTaa kar mere liye
baazaar-e-iltafaat meN naadaar hii raho

[najaat = salvation; mataa = goods/things; iltafaat = regard/kindness]
[naadaar = poor/pauper]

jab maiN tumheN nishaat-e-muhabbat na de sakaa
Gham meN kabhii sukuun-e-rafaaqat na de sakaa
jab mere saare charaaG-e-tamannaa havaa ke haiN
jab mere saare Khvaab kisii bevafaa ke haiN
phir mujhe chaahane kaa tumheN koii haq nahiiN
tanhaa karaahaane kaa tumheN koii haq nahiiN

[nishaat = joy; sukuun = peace; rafaaqat = companionship]
[karaahanaa = to cry out in pain]

.................................................. ......................

7.

juz gumaaN aur tha hi kyaa mera
bas faqat mera naam thaa mera

jab tujhe meri chaah thi jaanaaN
bas voh hi waqt tha kadaa mera

khudkushi kar le, jaan le vo agar
alaam-e-tark-e-mudd'aa mera

aa chuka pesh vo murravvat se
ab chaluN kaam ho chukaa mera

aaj maiN khud se ho gaya mayuus
aaj aik yaar mar gayaa mera

koi mujh tak pahuNch nahiiN sakta
itnaa aasaan hai pataa mera

.................................................. ..........

8.

uske pehluu se lag ke chalte haiN
hum kahiiN Taalne se Talte haiN !!

maiN usii tarah to behalta huuN
aur sab jis tarah behalte haiN

voh hai jaan ab har ek mehfil ki
hum bhi ab Ghar se kab nikalte haiN

kya taQalluf kareN ye kehne meiN
jo bhi khush hai, hum uss se jalte haiN

hai use'y duur ka safar dar'pesh
hum saNbhaale nahiiN saNbhalte haiN

hai ajab fai'sale ka sehraa bhi
chal na padiye to paa'oN jalte haiN

ho raha huuN maiN kis tarah barbaad
dekhne waale haath malte haiN

tum bano raNg, tum bano khushbuu
hum to apne sukhan meN Dhalte haiN

ummiid hai aapko jaun saahab ka aNdaaz pasaNd aayega

maikash

Shimul · 10th January 2006, 10:11 PM

Aadab~Dear Maikash Jee, garam-mijaazi se jiyada Unka Pyaar Nazaar Aaya...Haan, Parhte Houe Dil Rota Gaya Zarour...Par Bohot Achchha Bhi Laga...Ab Lafzon Mein Kaise Kehdoun Ki Kaisa Laga...**Dil Ki Gehraaion Ki Gehraaion Se Dher-o-Dher Saare Phoul,SHukriya Quboul Kijiyega

**Khush Rahiye ye Duwaaon ke saath ijaazat...**God bless You.

mehul jain · 11th January 2006, 11:08 AM

shukriya maikash bhiya aapne itne sundar kavita share ki aise hi share karte rahiyega

maikasH · 16th January 2006, 01:41 AM

shukriya shimul....

jaun sahab ke kuch aur kalaam :-

1.

tishna'kaami ki sazaa do to maza aa jaye
tum hameN zehar pilaa do to maza aa jaye

meer-e-mehfil bane baiThe haiN baRe naaz se hum
hameN mehfil se uThaa do to maza aa jaye

tum ne ehsaan kiya tha jo hameN chaaha tha
ab wo ehsaan jataa do to maza aa jaye

apne yousuf ko zulekha ki tarah tum bhi kabhi
kuch haseenoN se milaa do to maza aa jaye

chain paRta hee nahi hai tumhe ab mere beghair
ab jo tum mujh ko gaNwaa do to maza aa jaye

2.

Mein shayad tumko yuksar bhoolne waala hooN
Shayad, Jaan-e-jaaN shayad
Ke ab tum mujhko pehle se zi'ada yaad aati hoo

hai dil ghamgeen, bohat ghamgeen
keh aab tum yaad dil daraana aati hoo

shameem door mandah ho
bohat raNjeeda ho mujh se
magar phir bhi
mashaam-e-jaaN meN mere aashtee mandana aati hoo
judaii meiN balaa ka iltafaat-e-meharmana hai
qayamat ke khabar geeri hai
bay'had naaz bardaari ka aalam hai

tumhare raNg mujh meN aur gehray hote jaate haiN
mein darta hooN
mere ehsaas ke iss khwaab ka anjaam kya hoga!
yeah mere androon-e-zaat ke taraaj gar,
jazboN ke bairee waqt ki saazish na ho koi

tumhare iss tarha har lamha yaad aane se
dil sehma huaa sa hai
to phir tum kam hii yaad aoo

mata-e-dil, mata-e-jaaN to phir tum kam hii yaad aoo
bohat kuch beh gaya hai sail-e-mah-o-saal meN ab taq
sabhi kuch to na beh jaye
ke mere paas reh bhi kya gaya hai
kuch to reh jaye

maikash

maikasH · 16th January 2006, 01:50 AM

mehul jain sahab

bhai maiN to ye chahta tha ke aap sab dost bhi jaun sahab ka padha hua kuch na kuch yahaaN post karte........

lijiye unki ek aur Ghazal :-

naya ik rishta paida kyoN karaiN hum
bichaRna hai to jhagRa kyoN karaiN hum

khamoshi se adaa ho rasm-e-duuri
koi hungama barpa kyoN karaiN hum

ye kafi hai k hum dushman nahi haiN
wafadaari ka da'awa kyoN karaiN hum

wafa, ikhlaas, qurbaani, mohabbat
ab inn lafzoN ka peecha kyoN karaiN hum

suna daiN ismat-e-mariyam ka qissa?
par ab is baab ko waa kyoN karaiN hum

zulekha-e-azeezaaN baat ye hai
bhala ghaaTay ka sauda kyoN karaiN hum

hamari hee tamanna kyoN karo tum
tumhari hee tamanna kyoN karaiN hum

kiya tha e'had jab lamhoN meiN humne
to saari umar ii_fa kyoN karaiN hum

uTha kar kyoN na phenkeiN saari cheezeiN
faqat kamroN meiN Tehlaa kyoN karaiN hum

nahi duniya ko jab parwaah hamari
to phir duniya ki parwaah kyoN karaiN hum

haiN baashiNdey isii basti ke hum bhi
so khud par bhi bharosa kyoN karaiN hum

chaba laiN kyoN na khud hii apna dhaaNchaa
tumhaiN raatib mohayyaa kyoN karaiN hum

paRi rehnay do insaanoN ki laashaiN
zameeN ka bojh halka kyoN karaiN hum

ye basti hai musalmaanoN ki basti
yahaN kaar-e-maseeha kyoN karaiN hum

aadaab
maikash

mehul jain · 16th January 2006, 09:24 AM

shukriya bhaiya yen aur do kalam pesh karne ke liye inse hume bahut prerna milti hai

Shimul · **Khaamoshii Keh Rahii Hain Kaan Mein Keyaa? :) -** 16th January 2006, 02:48 PM

Khaamoshii Keh Rahii Hain Kaan Mein Keyaa...?
Aa Rahaa Hain Mere *Gumaan Mein Keyaa?
*Thought**

Ab Mujhe Koyii Toktaa Bhii Nahiin,
Yehii Hotaa Hai Khaandaan Mein Keyaa?

Bolte Kyoun Nahiin Mere Haq Mein,
*Aabale Par Gaye Zubaan Mein Keyaa?
*Blisters**

Merii Harr Baat Be-Asar Hi Rahii,
*Nuqs Hai Kuchh Mere *Bayaan Mein Keyaa?
*Fault**
*Method of expression**

Wo Mile To Ye Pouchhnaa Hai Mujhe,
Abhii HouN Main Terii *Amaan Mein Keyaa?
*Security**

Shaam Hii Se Dukaan-e-Diid Hai Bandh,
Nahiin *Nuqsaan Tak Dukaan Mein Keyaa?
*Loss**

Youn Jo Taktaa Hai Aasmaan Ko Tuu,
Koyii Rehtaa Hai Aasmaan Mein Keyaa?

Ye Mujhe *Chain KyouN Nahiin PaDtaa,
Ik Hii ShaKhs Thaa Jaahaan Mein Keyaa.......?
*Contentment**

*Writer: Jaun Eliya Jee**

*Keep Smilling.......

**

Parul · 17th January 2006, 12:06 AM

Maikhas ji,

Thank you very much for sharing such a beautiful creations... I really appreciate you.

musharrafhusain · 17th January 2006, 11:02 AM

maikash dost

John eliya mere pasindeeda shayer hain.
meri khush qismati hai ke mein ne karachi ki mehfilon mein baarha unhein suna hai.
un ka waqaee apna ek bohat makhsoos adaaz thaa aur unka andaaz e bayaan bohat hi alag aur bohat pur asr raha hai.
unka ek shayr:

"MEIN BHI AJEEB SHAKHS HOON-ITNA AJEEB HOON KE BAS"
"KHUD KO TABAAH KER LIYE AUR MALAAL BHI NAHEEN"

Un ki zindagi ka ghaliban aakhri shayr yeh thaa

" JAANE KYAA WAAQEAA HAI HONE KO"
"DIL BOHAT CHAHTAA HAI ROANE KO"

Maikash aap ka bohat bohat shukriyaa itne zabardast shayer ka selective kalaam yahan hem se share kerne ke liye.
God bless you.

musharrafhusian

23rd September 2006, 12:21 AM

tishna'kaami ki sazaa do to maza aa jaye
tum hameN zehar pilaa do to maza aa jaye

meer-e-mehfil bane baiThe haiN baRe naaz se hum
hameN mehfil se uThaa do to maza aa jaye

tum ne ehsaan kiya tha jo hameN chaaha tha
ab wo ehsaan jataa do to maza aa jaye

apne yousuf ko zulekha ki tarah tum bhi kabhi
kuch haseenoN se milaa do to maza aa jaye

chain paRta hee nahi hai tumhe ab mere beghair
ab jo tum mujh ko gaNwaa do to maza aa jaye

wah maikash ji buhut khubsurat ghazlain share ki app ne ap ke zariye humain bhi itna acha parrhnay ko mila thanks a lot

ramish · **Jon Eillia -** 28th May 2008, 12:45 PM

Adaab !

Jon Bhai na sirf ustaadon key ustaad they balkey mehfil ki jaan bhi they...un ki maujoodgi mien koi aur kiyaa boltaa...un ko sunna un ko dekhnaa bhi "humari Lughat" mien shair jaisaa thaa...mien ney un ko karachi mien buhut sunaa hey dekhaa hey un key paaoun chooey hien un key saath khana khaaya hey apney haathon sey un key haath dhulaaey hien...jis kisi ko jon bhai ki shairi pasand aatee woh humaara dost ban jata tha...Allah unhien apney jawaar-e-rehmat mien jaga dey...
mien ney un key saamney apni ghazal perhi thi ..unhoon ney mujhey sunaa mujhey shabaashi di merey liyey yeh kisi aezaaz sey kam nahin...un key inteqaal per bhi aik ghazal mien ney kahi thi...magar abhi
is thread mien un ki aik ghazal pesh ker raha hoon...

aik saayaa meraa masiihaa thaa !
kaun jaane, vo kaun tha, kyaa thaa ?

vo faqat sehn tak hii aatii thii
maiN bhii hujre se kam nikaltaa thaa

tujh ko bhuulaa nahiiN vo shaKhs ke jo
terii baaNhoN meN bhii akelaa thaa

jaan-levaa thiiN KhaahisheN varnaa
vasl se intizaar achchaa thaa

baat to dil-shikan hai par, yaaro !
aql sachchii thii, ishq jhuuTa thaa !

apne mayyaar tak na pahuNchaa maiN
mujhko Khud par baRaa bharosaa thaa

jism ki saaf-go’ii ke baa-vasf
ruuh ne kitnaa jhuuT bolaa thaa !

ramish