Sar-e-tasleem Kham hai...

[B.G.M.]

Dosto!

Aaj aap ke liye Ik Nazm pesh kar rahaa huuN.

Nazm ke shaa'ir ke naam kaa mujhe ko'ii ilm nahiiN hai,
Agar aap meN se kisii ko agar pataa chalay to mujhe aagaaH zaruur keejiyegaa.

Nazm se pehle Ik She'r,

[size=9pt]
"agar baKhshe zah-e-qismat, nah baKhshe to shikaayat kyaa
sar-e-tasleem Kham hai jo mizaaj-e-yaar meN aave"

~Haidar Ali "aatish"
[/size]
-------------------------------------------
Nazm
[size=10pt]
tumheN zid hai kih iqraar-e-wafaa tum ne nahiiN karnaa
miri taqdeer meN rang-e-Hina tum ne nahiiN bharnaa
tumheN manzuur hai shaayad mira ghuT ghuT ke hi marnaa
tumhaare faiSile par yeh sar-e-tasleem Kham ho gaa

maiN apne honT see luuN gaa
yuuN hi be-kaif jee luuN gaa
tumhaare hijr ki tasweer ko dil meN sajaa luuN gaa
tumhaare jabr, apne sabr ko maiN aazmaa luuN gaa

magar ik baat maiN puuchhuuN..... .......?
tumheN apni qasam,
tum sar pe rakh ke haath yeh kehnaa

tumhaare dil meN mere naam se hal-chal nahiiN hoti??
JawaaN raatoN meN meri yaad ki shamm'eN nahiiN jaltiN??
tumhaari dhaRkano meN kyaa miri sochaiN nahiiN paltiN??

to phir tum ne azeeyat ki ridaa kyuuN taan rakkhii hai??
yeh dil meN thaan rakhi hai!
bohat be-chain Khud rehnaa, mujhe barbaad saa rakhnaa
bhulaanaa bhi to, iss ke saath kuchh kuchh yaad saa rakhnaa
har ik andaaz ko apne sitam-eejaad saa rakhnaa

agar iss shauq se tum ko ko'ii taskeen milti hai
mire Zakhm-e-talab kaa tazkirah ab kam se kam ho gaa
tumhaare faiSile par yeh sar-e-tasleem Kham ho gaa

================================================== ====

[size=7pt](shaa'ir naa-maaluum)[/size]

[/size]

[maikasH]

haaye, haaye, haaye!!

kya nazm dhooNdhi hai BGM saahab, qurbaan jauuN aapke

to phir tum ne azeeyat ki ridaa kyuuN taan rakkhii hai??
yeh dil meN thaan rakhi hai!
bohat be-chain Khud rehnaa, mujhe barbaad saa rakhnaa
bhulaanaa bhi to, iss ke saath kuchh kuchh yaad saa rakhnaa
har ik andaaz ko apne sitam-eejaad saa rakhnaa

yeh baNdh to kamaal ka huaa hai, shaayir ka naam to maiN bhi nahiiN jaanta lekin jis meherbaan ne bhi likkha hai khuda unke qalam ko aur teziiyaaN bakhshe!


maiN na kehta tha ke aap aaye to idhar kamaal bhi aayeNgey misaail aapne haazir kar di hai

aapka behadd shukriya hazrat

rab raakha
maikash