har ek baat pe kehte ho tum - Ghalib

[aadeil]

har ek baat pe kehte ho tum ke 'too kya hai' ?
tumheeN kaho ke yeh andaaz-e-guftgoo kya hai ?

na shole meiN yeh karishma na barq meiN yeh ada
koee batao ki woh shoKH-e-tund_KHoo kya hai ?

yeh rashk hai ki wo hota hai ham_suKHan tumse
wagarna KHauf-e-bad_aamozi-e-adoo kya hai ?

chipak raha hai badan par lahoo se pairaahan
hamaaree jeb ko ab haajat-e-rafoo kya hai ?

jalaa hai jism jahaaN dil bhee jal gaya hoga
kuredate ho jo ab raakh, justjoo kya hai ?

ragoN meiN dauDte firne ke ham naheeN qaayal
jab aaNkh hee se na Tapka to fir lahoo kya hai ?

woh cheez jiske liye hamko ho bahisht azeez
siwaay baada-e-gul_faam-e-mushkaboo kya hai ?

piyooN sharaab agar KHum bhee dekh looN do chaar
yeh sheesha-o-qadah-o-kooza-o-suboo kya hai ?

rahee na taaqat-e-guftaar, aur agar ho bhee
to kis ummeed pe kahiye ke aarzoo kya hai ?

bana hai shaah ka musaahib, fire hai itaraata
wagarna shehar meiN 'GHalib' kee aabroo kya hai ?

[sameer'shaad']

waahhhhhhhhhhhhhhhhhhhh......................... laajawaab ghazal pesh ki hai aapne adeil saahab. mazaa aa gayaaa, aur Ghalib chachaa ke fan to hum barson se haiN... dukhti ragoN ko chheD de wo jadugar hai Ghalib... bahot khooob peshkash..... aise hi kalaam hum sab ke saath baaNtete rahiye......

Shukriyaa

shaad...

[zarraa]

shukriya Aadeil ji .... ye meri sab se zyaada pasandeeda ghazlon mein se hai ...

[aadeil]

na shole meiN yeh karishma na barq meiN yeh ada
koee batao ki woh shoKH-e-tund_KHoo kya hai ?

ragoN meiN dauDte firne ke ham naheeN qaayal
jab aaNkh hee se na Tapka to fir lahoo kya hai ?

Ghalib saab ke andaaz hi nirale hain. unkee ye adaa pe to hum meherbaan hain