bikhre huwe sher ... -
28th March 2019, 07:40 PM
kabhi ehsaas ki qillat* meiN taraste jaooN
kabhi jazbaat ki garmi se pighalte jaaooN
*scarcity
kabhi rindoN* ki panaahoN meiN bahakte jaaooN
kabhi zindaaN** meiN zamaane ke tarhapte jaaooN
*drunks **prison
bas ye keh keh ke safar zeest* ka karte jaaooN
aablaa-paa** hooN pa kuchh gaam*** hi chalte jaaooN
*life **person with blisters in the feet ***steps
maiN hooN wo abr* kisi baagh pe barsa jo naheeN
kisi sehra** se bhi guzrooN to baraste jaaooN
*cloud **desert
haakim-e-shahr tum ilzaam lagaate mujh par
maiN har ilzaam se tum ko bhi parakhte jaaooN
kyooN maiN khaamosh hooN kaise kahooN sohbat ka asar
koyee dildaar ho aage to chahakte jaaooN
hai mujhe fikr ke apnoN ko bahaut fikr meri
larhkharhaata hooN wo jab kehte samhalte jaaooN
teri khushboo mere ehsaas meiN aise hai basi
tu ne ik baar chhua tha ke mahakte jaaooN
har taraf bikhre huwe sher mile haiN “zarraa”
kuchh ko daaman meiN chunooN kuchh ko kuchalte jaaooN
- zarraa
maiN rehnuma ke kahe raastoN se door raha
mera maqaam sada manziloN se door raha
|