tasavvur meN rahaa karti hai tujh se guftaguu, aksar! -
30th August 2015, 10:15 AM
dosto, aaj ik Khuubsuurat Ghazal ke chand ash'ar aap se share kartaa huuN, ummeed hai kih aap ko bhi pasand aayegi
maiN isay hamaare dost Dhaval ki nazr kartaa huuN
=============================================
Ghazal
kiyaa kartaa huuN tanhhaa’ii meN ashkoN se wuzuu, aksar
tasavvur meN rahaa kartii hai tujh se guftaguu, aksar
tiri aankhoN meN Khud ko DhuuNDtaa huuN is liye shaayad
kih apnii hii rahaa kartii hai mujh ko justajuu, aksar
takaa kartaa huuN tanhaa baiTh kar pehroN jo phuuloN ko
tiri hi unn meN hotii hai shabaahat huu-ba-huu, aksar
woh raaz-e-dil jisay phuuloN ki suurat dil meN rakkhaa thaa
usii ki to mehak phailii hai, jaanaa! chaarsuu, aksar
wafaa-e-deen ka dam to sabhii bharte haiN, lekin kyuuN
isii ke naam par galiyoN meN behtaa hai lahuu, aksar!
==============================================
(Shaa'ir naa ma'aluum)
--------------------------------------------------------------
Last edited by B.G.M.; 30th August 2015 at 10:17 AM..
|