shahadat haq ki dene ko to haiN tayaar , boleiNge -
5th May 2003, 11:16 AM
puraani shaan o shaukat ke sabhi aasaar boleiNge
khaNdar waloN pe kya guzri , dar o deewar bolgeiNge
ye taye hona abhi baqi hai, aye dildaar boleiNge
ke kisko dushman e jaN aur kis ko yaar boleiNge
na poocho haal e dil mera, mujhe khamoosh rahne do
ke meeri daastaN saari merey ashaar boleiNge
unheiN kal kaun jaane ga jo akhbaroN mai chapte haiN
zamaana yaad rakhe ga , agar kirdaar boleiNge
qalamkaroN ki nasloN ka na jaane haal kya hoga
jo dunya chahti hai gar wahi akhbaar boleiNge
hamaari be gunaahi ki gawaahi to lahu dega
the munsif parsaa kitnay , ye kal ko daar boleiNge
hameiN kis bat ka dar hai, hatheili par hai sar apna
shahadat haq ki dene ko to haiN tayaar , boleiNge
|