kaam aa sakiiN na apanii wafaayeN to kyaa kareN (Akhtar Shirani)

[maikasH]

Majaz saaheb ka majmoa padh raha tha to Akhtar Shirani saaheb ki yeh Ghazal zahan meiN aa baiThi, socha post kiye deta hooN



kaam aa sakiiN na apnii wafaayeN to kyaa kareN
ik bewafaa ko bhuul na jaayeN to kyaa kareN

mujh ko ye etaraaf duaaoN meiN hai asar
jaayeN na arsh par jo duaayeN to kyaa kareN

[etaraaf=concurrence/agree; arsh=seventh heaven]

ik din kii baat ho to use bhuul jaayeN ham
naazil hoN roz dil pe balaayeN to kyaa kareN

[naazil=to fall upon; balaaye.n=troubles]

shab bhar to un kii yaad meiN taare ginaa kiye
taare-se din ko bhii nazar aayeN to kyaa kareN

ahad-e-tarab kii yaad meiN royaa kiye bahut
ab muskuraa ke bhuul na jaayeN to kyaa kareN

[ahad-e-tarab=promise of good times]

ab jii meiN hai ki un ko bhulaa kar hii dekh leiN
vo baar baar yaad jo aayeN to kyaa kareN

tark-e-wafaa bhii jurm-e-muhabbat sahii "Akhtar"
milne lageN wafaa kii sazaayeN to kyaa kareN !!

[tark-e-vafaa=end of faithfulness (love)]