suroor-e-nazar, wajd-e-qalb-o-jigar ho to ghazal hoti hai

[fersahab]

Azeezaan-e-mehfil, nacheez ka aadaab qubool farmaayen, guzashtaa dinon mohtaram irfan sahib ne ek dil-kash zameen maen apne hi makhsus andaaz maen ek shaandaar ghazal pesh ki aur yakbayak deegar shohraa ne bhi is par taba-aazmayee ki ….….maen amooman taba-aazmaayee se gurez karta hun lekin pata nahi is martaba be-ikhteyaar tabiyat is jaanib mael hui … …aur nateejan ek ghazal tashkeel paayi …..aap sabhi se pur-khuloos darkhwaast hai k apni besh-qeemti araa, tabsire, tanqeed-o-islaah se bharpur nawaaziyegaa…….inaayat hogi ……haalanke maine sahal alfaaz istemaal kiye hain phir bhi baaz doston ke liye sahulat ka baais bane….. lihaazah chand alfaaz ke maine bhi darj kiye hain…...maen hamesha hi ke manind muntazir-o-mamnuun rahungaa……......




suroor-e-nazar, wajd-e-qalb-o-jigar ho to ghazal hoti hai
kuch is tarah ki kaifiyaat se guzar ho to ghazal hoti hai

badli maen chipa nazar aata qamar ho to ghazal hoti hai
zulmat-e-shab maen umeed-e-sahar ho to ghazal hoti hai

kuch faiz-e-khudaai kuch fikr-o-nazar ho to ghazal hoti hai
kuch aisa muqaddar, kuch aisa hunar ho to ghazal hoti hai

gham-e-hastee kaa tanhaa safar ho to ghazal hoti hai
dil gham-zadaa aur diidaa-e-tar ho to ghazal hoti hai

raahat-e-shorish-e-zeest muyassar ho to ghazal hoti hai
aaghosh maen khalvat ke jo ghar ho to ghazal hoti hai

harsoo sanaatta na apni khabar ho to ghazal hoti hai
saaye se bhi apne lagtaa dar ho to ghazal hoti hai

raah-e-bekhudee kaa koi safar ho to ghazal hoti hai
manzil bhi apnee teri raahguzar ho to ghazal hoti hai

radeef bhi ho qaafiya aur behr ho to ghazal hoti hai
ehsaas tahreer kaa koi daftar ho to ghazal hoti hai

aap puchtey hain kyun aisaa agar ho to ghazal hoti hai?
jee haan, tamaam baaton kaa asar ho to ghazal hoti hai

Jis bazm maen ham jaison ka basar ho to ghazal hoti hai
Qaari ho tumsaa shayar agar fer ho to ghazal hoti hai


chand alfaaz ke maine:
suroor-----joy
wajd------ecstasy
qalb----heart
kaifiyat----condition
qamar---moon
zulmat-e-shab-----darkness/oppression of the night
faiz-e-khudai---grace/blessing of god
fikr-o-nazar-----deep introspection
hunar----skill
shorish-e-zeest------turbulence of life..
muyassar-----to obtain
aaghosh----embrace
khalvat-----solitude
gham-e-hastee----sorrows of life
gham-zadaa------grief stricken
diidaa-e-tar----moist eyes
bekhudi-----rapture
raahguzar----a path
sanattaa-----howling wilderness
harsoo----every direction
radeef-----after qaafiya
qaafiya----rhyme
behr-----meter
tahreer-----description
daftar------ register/collection
qaari-----reader

[Shimul]

Aadaab,
Bohot khub, dilse shukriya aur dilse nikli houi Daad ko bhi kubool kijiyega...jee haan, ab bilkul samajh aa gaayi hain ke Gazal kisse kehte hain. Badehi khubsurti se aapne alfazon ka istemal ki hai,
Younhi likhte rahiyega. Aur haan, kuch kami rehgaayi thi...Gazal ke sath phool bhi honi chahiye...for your writing some flowers....... white Lily theek rahegi... Mujhe bohot pasand hain.......Khush rahiye yeh Duwaon ke sath ijaazat chahoungi. Take care. God bless you. Allah Hafiz.

Keep smilling.......