apni hastee ka hota sabhi ko paas hai

[fersahab]

azeezaan-e-mehfil...aadaab qubool farmayen...ek aasaan zameen maen kuch kahne ki jasarat kar raha hun....umeed hai hasb-e-maamool aap sabhi..apne araa, tassuraat, tanqeed-o-islaah se bhar-pur nawaazenge....maen muntazir rahunga...shukriya


apni hastee ka hota sabhi ko paas hai
apni apni nazar maen har koi khaas hai

jis khushi ki yaas maen gum umr saari
gar sochho to vohi dil ke aaspaas hai

yun to sabhi apne apne safar ke raahee
par ek hamsafar ki har kisi ko aas hai

tishnagi badhne lagi deedaar-e-yaar ki
bujhti nahi jo kabhi ye voh pyaas hai

ladkhadati zubaan shikwaa-e-jaur-e-adoo
hota nahi hamse zor-e tark-e-ikhlaas hai

hoga jahaan maen qaem aman kis tarah?
aadmi ko hii nahi aata aadmi raas hai

husn-o-ishq se pare aaj fikr-o-nazar meri
pehlu maen tere dil phir bhi udhaas hai

behis hui jati hai "fer" aalame-zindagi
na khushi ab koi na gham-e-ehsaas hai