Dosto,
aaj ik deegar meHfil meN, ik Ghazal paRhii, mujhe is ki ravaani aur bunat
bahot achChhii lagi.
Ghazal kaa teesra She'r mujhe Khaas taur par pasand aayaa, us She'r ki saadagi aur Khuubsuurati dekhiye.
Ghazal
paa hi lee ham ne bhi shifaa aaKhir
dard hi ban gayaa dawaa aaKhir!
'Ishq meN jis ka thaa hameN Khadsah
Waa'e qismat! wohii hu'aa aaKhir!
kaan betaab thay jo sun ne ko
us paree-ruu ne keh diyaa aaKhir!
kyuuN hai Khaamosh eik muddat se
gul ne bulbul se kyaa kahaa aaKhir?!
thaa muqayyad jo ashk palkoN meN
qaid se ho gayaa rihaa aaKhir
sab hi kehte thay saNg-dil jis ko
ho gayaa dard-aashnaa aaKhir!
ro' rahe ho kyuuN aise, Khwajah jee
kuChh to kahiye kih kyaa hu'aa aaKhir?
~Khwajah Ashraf
http://www.bazm.urduanjuman.com/inde...2.msg62645#new
=====================================