Phooljaan se manda tak ka safar
Manda baramde ke otae par baithi thi . hath mai kaichi aur paper tha… n janae kyun kaat rahi thi. Mai paas gayi.. aur pith par hath ferte kaha, “ kaisi ho? Kya kar rahi ho? Lag n jaaye kahi kaichi … samhaal ke.. jara”
manda mushkuraai.. “ didi.. aap aa gayi. Mai paper ko gol kaat rahi hu. Gol ho hi nahi raha . aap kaat do na.. aao yaha baitho na paas mai”
mai manda ke paas baith gayi. Hath mai kaichi aur paper lete huae maine akha , “ thik se kaat nahi paayi mai to gusaa to nahi karogi na?”
“kya didi aap bhi…” manda mushkura kar boli. Maine gol aakar mai paper kaat diya… manda ko dete huae pucha .. k dekho ab thik hai?”
oongliyo se paper ko tatol kar dekhti rahi manda aur fir kaha, “ haan bilkul thik hai”
maine pucha, “ kya karogi ab iska?”
“didi.. paise rakhne ka batuwa banaaungi.. to ooske base mai yah paper daalne se thhoda kadak rahega na . is liye. Mai manda ki soch se khush hui. Manda kuch tumhare bare mai bataaogi? Mere puchne par manda ne mera hath pakad liya.. aur kaha .. didi… soonogi ? aur manda ke sath mai ooske waqt mai chal padi.
Jab manda ne kaha ke pahlay ooska naam ‘phooljaan’ tha.. ‘phooljaan’ naam soon kar mera dhyaan gaur se ooske chehre par gaya.. meri nazar dundhne lagi ek aisa chehra jis mai phool jaisi jaan ho. Par gaore rang ke sath sapaat chehre ke alawa kuch nazar nahi aaya. Ek pal ko chaand ki mahezabin bhi yaad aa gayi.. mahezabin ko ooska naam puchne par who kahti – ‘abbu ki jaan’ . par west bangaal ke kisi chhote se shahar mai rahti phooljaan shayed apne abbu ki jaan n thi… hoti to bhari baarish mai.. tapte bukhaar mai bilakhti 5 saal ki phholjaan ko ooski maa k sath aspataal tak chhod kar kahi chala n jaata.. aspataal mai kamra n mila… maa roti rahi.. aspataal ke baramde mai .. 3 din lagataar behoshi se aalam mai phooljaan murjhati gayi… dr. ne bedarkaari se kah diya k yah ladki to mar gayi hai.. maa sar par hath rakh kar foot foot ke rone lagi. Tabhi phooljaan ne halke se aankhe kholi.. aankh khuli to sahi par is bukhaar ne .. ooski aankho ki roshni le li thi.. phooljaan andhi ho gayi thi.
Ooske abaa aaye the oose lene . fir kai jagah par ilaaj k liye le kar bhi gaye par aankh ki roshni wapas nahi aayi. Oose Dumb and Deaf school mai daakhila mila . padhne mai tez thi. Par hath se sparsh kar k padhne ko humesha sust ho jaati.. ooski kaabiliyat dekh kar principal ne
Oose puchha… mumbai jaaogi ? aage padhne ? aur yuwaan ho rahi phooljaan mumbai aayi. Yaha sanstha ke aashram mai rahti thi or aage padhti thi. Ab ooska padhna yaani .. sirf padhna nahi tha… sath mai khud ko aage badhane ki taiyaariya thi.. jivan ke sangharsh mai kaise hasna yah sikh rahi thi yaha phooljaan . chhutiyo mai ghar gayi thi .. waha ja kar niraash ho gayi. Ghar mai abaa nahi the . oose kaha gaya ke abba mar gaye… par oosne muje kaha k didi .. abba mare nahi the .. mujse sab juth kahte rahe.. muje pata chal gaya tha abba humae chhod kar chale gaye the kisi aur ke paas.. ghar ki garibi .. maa ki bismaar haalat .. phooljaan ne tay kiya .. ab mumbai mai hi rahegi.. yaha nahi aayegi… abbaa ki yaad jahan se jaati nahi thi yaha par. Wapas aa kar oosne sanstha ke oopri se baat ki. Muje aage bhi yahi rahna hai… muje koi kaam chhaiye…
Aur ek production co. mai naukri mil gayi .. kaam tha… box mai saaman rakh kar warranty card daal kar box pack karna. Teen saal ki is naukri mai phooljaan ki pagaar 450 rs. Se 900 rs. Hui. Sath mai kaam karte ek saahab ne kaha k, “phooljaan shadi karogi ? ek ladka hai meri nazar mai..”
Aur Phooljaan ki shadi ho gayi.. Maharashtriyan vitthal se shadi kar ke phooljaan ab manda ho gayi.
Vithhal bhi andha tha. Chhota mota kaam who bhi karta tha par jyada kamata nahi tha.. par manda ghar ko samhaalne mai achhi rahi. Khud ke aur pati ke pagaar se ghar chala leti thi. Aankh ki kami har jagah takleef deti thi par chlna rooka nahi tha… sanshta walo ne bhade ka ghar bhi le kar diya tha. Ghar ke sare kaam nipta kar kaam par jaati aur wapas aa kar raat ko fir se ghar ke baki ke kaam mai joot.ti manda ki kamar kaam se nahi jhooki kabhi par vithhal ki maar se jhukne lagi thi… aise mai manda maa banne
wali thi par bachaa janam le oos se pahlay ander hi mar gaya.. dr. ne oose teen mahine aaram karne ko kaha tha… manda ne muje kaha tha.. didi, sabse badi galti meri ab ho gayi thi ke maine kaam se resign de diya tha.. kyuki tabiyat sath nahi de rahi thi. Par 2 mahine mai hi thik ho gayi manda… par ab kya karti bina naukri ke …
kuch to pahlay se aadat thi khud jine ki to ab ghar mai bina kaam ke maan vidroh sa kar raha tha aur pati ki chhoti pagaar mai ghar cahlana bhi mushkil sa ho gaya tha… har roz ke jhagde maar piit… manda maansik taur se bimaar hoti gayi. Kuch arsa yunhi bita… kahi n kahi se 500 rs ki naukri jutaa paayi… . par khush n thi.. “itne pagaar se kya hota didi ?” muje kahne lagi. Ab manda ek ladke ki maa bhi ban gayi. Amol naam rakha tha bache ka . sabse khushi yah thi oosko k amol dekh sakta hai. Ab garibi ne aur bhi jhaanse mai liya.. oos par vithhal ki maar.. manda maan se asthhir hone lagi…
aur ek din who khush ho gayi. Vithhal ne oose kaha k aaj woh oose kapde khareed ke dega. Oose le kar vithhal yaha le aaya.. aur bina bataaye chalaki dikha kar manda ko mahila aashram mai chhod kar chala gaya. Haan aaj manda mahila aashram mai hai 1 saal se. amol ke liye tarasti manda pagal ho gayi hai . raat raat bhar jaagti hai … so nahi paati… kyuki oose amol ki aawaje sone nahi deti …
muje manda ne kaha , “ didi… amol ko samor [paas ] ki building mai band kar k rakha hai . oose bahut maarte hai waha… oosko acting sikhate hai bikh maangne ki … wo raat ko rota rahta hai… mai kaise so sakti hu? Maine ooska hath mere hath mai liya… sahlaati rahi..
aage manda ne kaha k “ vithhal ne kaha tha ke christmas par ghar le jaayega par le nahi gaya.. ab to mai thik hu. Vithhal hi juth bolta hai ke amol ghar par hai. Mai jaanti hu amol yahi samor ki building mai hai. Is mahine ab shayed vithhal aa kar le jaaye muje. Yaha achha nahi lagta hai didi…. Mai kisi se baat nahi karti yaha. Didi aap fir kal aaogi mere paas? Mujse baate karne ?
kal to nahi aa paaungi par jaldi hi fir aaungi ka wada kar ke mai manda ke waqt se baahar niakl kar kahdi hui.
kai waqt ke tukde aise bhi hote hai.. jinse aap baahar niakl kar bhi baahar nahi ho paate.
manda ki didi - meena