Khuda ke liye Shayri.com ko shayri ke liye hi rehne deN...

[prasaxena]

Aziiz Dosto

Adaab

Mujhe bohat takleef ho rahi hai yahaN jo bhi kuch chal raha hai ye dekh kar. Bohat logoN se shikayateN aayeen haiN ke yahaN ka mahole badmaza hota ja raha hai.

Afsos ki baat ye hai ke ye site jo sher kehne aur sunane ke liye hai usey yahaN ke membaran ne dating-joint meN tabdeel kar diya hai. Shayrana zaban ki jagah galiyoN aur bhadde afaaz ne le li hai. Log jis tarah ke alfaaz istemaal kar rahe hain wo badi sharm ki baat hai. Jab paRh kar sharm aati hai to un hazraat ko wo alfaaz yahan likh kar chaspaaN karte huve kyuN nahin aayee.

Sabhi dostoN maiN is baat se aagah karva duuN ke behtar hoga ke is tarah ki batoN ke liye koi aur jagah chun leN. Ab yahan se aise logoN ka daan-paani uth gaya samjheN. MaiN baRi hi saKhti se aisee har post ko delete karne jaa raha huuN. Aur gandi zaban wale har member BAN karne ja raha huuN.

Ye baat tai hai ke is site par is qism ki harketeN yahaN bardasht nahiN ki jaayeNgi. Chahe jo bhi ho.
Aur jo log is jagah se pyaar karte haiN unse meri guzarish hai ke Khuda ke liye apne waqt men se kuch lamhe iske liye nikalen aur yahaN hone waali kisi bhi badmaza baat par nazar rakhen aur uskii ittela mujhe deN. Foran action liya jaayega.
Ummeed hai aap sab is baat par ghaur kareN ge aur yahaN ke haalt theek karne meN meri madad kareNge.

“YahaN Khaskar Ekta ji ki post ka zikr karna chahuN ga. Ekta ji aapko ye post nahiN karni chahiye thi. YahaN aapki tasveer ki zaruurat nahiiN hai. Agar aap shayri karti haiN to most welcome. Aapki post delete ki jaa rahi hai.”

Khaksaar
Praveen Saxena

[salman shaikh]

Janab Muhatraam Pareveen Sahab... hum apki baat se itefaak rakhte hain yaqeen kijiye apne yahan yeh reply karke hum sab pe bahut mehrabaani ki hai Janab yahan bahut baad zubani hu rahi thi bahut logon ko shikyaat thi yaqeen kijiye parveen sahab kitne purane shayer hain yahan ke jinse mere aj bhi rabta hai sabne yahan likhna band kar dia yahan taak ke mujhe afsoos hai ke main ne bhi band kar dia Parveen bahi ap dekhiye kitne shayri ki copy ho rahi hai lekin janab bahut log yaahn bad zubani karte hain joke ache shayer ke liye sharaam ki baat hai janab main apke is khat se beintiha itefaak rakhta hun apki bari nawazish parveen sahab meri yeh guzarish hai ke ap roz is site pe nazar dala kijiye janab take is site ko hum waise hi roshaan kaar sakein aur wapas un shayron ko la sakein jo dil o mehnaat se yahan likha karte the aur phir se ek dafa is shayri.com main log ek dosre se apna ghum batein nahi ke date ka markaaz banayein janab is site pe hum chahte hain ke kuch rules aaid ki jayein joke hum apko aainda waqt main private main aga kareinge hamari kissi baat se apka dil dhuka hu tu hum teh-e-dil se maafi ke talaab gaar hain ap apse ijazat chahinge ....Kudha Hafiz....

Allah Pak De Hawale...

ek anjaan sa shaks...
salman shaikh...