Geet- Rukh-e-roshan kabhi hum bhi nazaara karengey

[Mujahid Ali]

Rukh- e -roshan kabhi hum bhi nazaara karengey
Har sitam terey mohabbat mai gawaara karengey
Itni jurrat nahi ke rukh se utha duu pardah
Dekhna voh hi nigaaho se ishaara karengey

Gul jahaa khiltey ho ulfat ke voh gulzaar ho tum
BaghbaaN bhi kahey ke qaabil-e-deedaar ho tum
Kuch terey husn ka sadqa ho muyassar mujh ko
Issi khairaat se hum zeest guzaara karengey
Rukh- e -roshan kabhi hum bhi nazaara karengey
Har sitam terey mohabbat mai gawaara karengey

Eik arsey se mohabbat ka talabgaar hu mai
Sach toh ye hai ke mohabbat ka parastaar hu mai
Terey ulfat ka sahaara mujhe gar mil jaaye
Ishq ke shehr mai ta’ameer minaara karengey
Rukh- e -roshan kabhi hum bhi nazaara karengey
Har sitam terey mohabbat mai gawaara karengey

Miltey hai dost bhi kuch raah-e-mohabbat mai kabhi
Hotey kuch log hi qurbaan sadaaqat mai kabhi
Hamey manzil miley ya na miley aye jaan-e-wafa
Jaha se guzrey ge hum tum ko hi pukaara karengey
Rukh- e -roshan kabhi hum bhi nazaara karengey
Har sitam terey mohabbat mai gawaara karengey

[Madhu 14]

. Itni jurrat nahi ke rukh se utha duu pardah
Dekhna voh hi nigaaho se ishaara karengey

Kya baat hai.........Waaahh!!!!

Bahot pyara geet pesh kiya hai mujahid sahab....
Behad khoobsoorat ehsaas..

Daad pesh hai...

Likhte rahein

[sameer'shaad']

bahot hi khoobsurat kalaam pesh kiyaa hai aapne Mujahid saahab.....

likhte rahen......

Shaad...