Quote:
Originally Posted by maikasH
aadaab yaaran-e-mehfil,
ek nazm, jo dar asl haqeeqat ka aainaa hai, aapki khidmat meiN haazir kar raha hooN. aaj kaifiiyat kuch aisi hai is nazm ko post karte hue jhijhak nahiiN ho rahi hai vagarnaa aam haalaat meiN yeh kabhi post na hui hoti
mulaiiza kijiye
na maa ne mujhe goad hi meiN uThaaya
na waalid ne apne gale se lagaaya
mehruum rakkha gaya har khushi se
haaN! mujhko bahot hai gilaa ziNdagi se
na seene se apne kisi ne lagaaya
na baahoN ke ghere meiN jhuula jhulaaya
na mujhko kabhi lo'riyaaN hi sunaayiiN
na zaaNooN pe rakh ke kisi se sulaaya
na bachpan bhi mujhko milaa ziNdagi se
haaye! kyoN na karuN maiN gilaa ziNdagi se?
thokaroN ne nawaaza, saNbhaltaa raha hooN
dehaktee rehguzar pe bhi chala raha hooN
chaltee rahiiN aaNdhiyaaN nafratoN ki
chiraaGhoN ki maaniNd jaltaa raha hooN
mere waalid-e-mohtaram ne kahaa hai :
"mere haath se qatl tera likhaa hai"
lekin kabhi zikr mujhse kiya naa
ke aakhir gunaah mujhse kya ho gaya hai
maine kahaa , mere pyaare se abbu
meri jaan par haq tumhaara bajaa hai
tumhiiN ne mujhe ziNdagi se nawaaza
tumhi maar daalo , meri iltijaa hai
na jeene ki himmat na marne ka dam hai
khuda tu, rihaayi, dillaa ziNdagi se
haaN....mujhko bohat hai gilaa ziNdagi se
|
Maikash bhai..apne jin khayaalaton ko alfaazon mein dhaala hai uski mohabbat ki gehraayi shayaad jaan paana na mumkin hai...
zindagi se gilaa rakhne waale hi zindagi ki ahemiyat jaante hai...apke har misre mein ek alag sa aks nazar aaya mujhe kahi ranjish to kahin razaa, gilaa bhi kahi to kahi tha silaa...
Behad khoob andaad-e-bayaan ustaad ji...
nacheez ki duaa aur daad qubool farmiYeGaa