jab se dil meiN sukoon taari hai -
17th July 2020, 08:35 PM
ghalib ki zameen par, maazrat ke saath
jab se dil meiN sukoon taari hai
“seena jooya-e-zakhm-e-kaari hai”#
#ghalib ka misra
phir bulaane laga hai dasht-e-junooN
phir ye zindaan-e-hoshiyaari hai
phir kisi naakhuda ka dhoka hai
phir wo girdaab ki sawaari hai
“ho raha hai jahaan meiN andher”#
ai falak kis ki parda-daari hai
#ghalib ka misra
wo ye kehte ki ye hi duniya hai
hum ye kehte talaash jaari hai
vasl ke haiN naye naye dastoor
hijr ki rasm ashq-baari hai
aish se bhar rahe khushi ki khala
dil-navaazi bhi dil-figaari hai
ab ye mushkil hai donoN hi jaanib
tark-e-ulfat ki paasdaari hai
“zarraa” pehle bhi ho chuke ho tabaah
“phir kuchh ik dil ko beqaraari hai”#
#ghalib ka misra
- zarraa
maiN rehnuma ke kahe raastoN se door raha
mera maqaam sada manziloN se door raha
|