Shanti ki kya hai paribhasha...

[Madhu 14]

naye saal me apni purani diary lekar baithi to bahut yadein taza ho gayi...salon pahle jab sdc par nahi thi jo dil me aaya dairy me likh leti thi...unhi me se ye ek kavita fir se padhi socha aap sab se share karoon......


main soch rahi thi.....

Shanti ki kya hai paribhasha
Kisi aisi jagah jaun jahaan ho shanti ki asha...

Main shor bhari bheed se door bahut door chali ja rahi thi
Par kuch awaazein fir bhi kahiin se aa rahi thi.

Palat kar dekha rasta sunsan tha,
Vo ped patte phool sab kuch anjaan tha.

Maine socha bas shanti yahiin hai
Par aisa laga mera man aur kahiin hai.

Man ko vapas lane ki koshish ki
Shunya me dhyaan lagane ki koshish ki.

Meri har koshish nakaam ho rahi thi
Vahi shor vahi awazein ab bhi aa rahi thi.

Achanak ek dheemi si awaaz mere kano se takrai..
Laga ki ye awaaz mere andar se thi aai

Are ye kya shanti to mere andar hee thi
Mere man ke shor se dabi ja rahi thi..

Ab to shanti ki talaash ke bajay
Kuch aur hee prshan mere zehan me aaye..

Ye kaisa shor jo mere andar hai..
Ye kya tufaan hai ?ye kya samandar hai?

madhu..