naye chiraaGh jalaa'o kih roshanii kam hai! -
15th May 2015, 01:24 AM
Shaahid Siddiqi ki ik Ghazal pesh-e-Khidmat hai,
Ghazal
yeh kyaa sitam hai kih eHsaas-e-dard bhii kam hai
shab-e-firaaq sitaaroN meN roshanii kam hai
yeh kaisi mauj-e-karam thii nigaah-e-saaqi meN
kih us ke b’aad se tuufan-e-tishnagi kam hai
qareeb-o-duur se aati hai aap ki aawaz
kabhi bahut hai Gham-e-justujuu, kabhii kam hai
sha’uur-e-‘ishq ab aayaa hai apni manzil par
huzuur-e-Husn tamannaa-o-bekhudii kam hai
tamaam ‘umr tira intezaar kar leiNge
magar yeh ranj rahegaa kih zindagi kam hai
nah thay bahaar-e-chaman ham, magar yeh sunte haiN
hamaare b’aad guloN meN shaguftagii kam hai
nah saath deNgi yeh dam to’Rtii hu’i shamm’eiN
naye chiraaGh jalaa’o, kih roshanii kam hai
~Shaahid Siddiqi
-------------------------------------------------------------------------------
+
|