Aurat -
26th August 2015, 08:48 AM
Aurat ka darjah Humanity mei.N aur Insaniyat mei.N sub se baala ter hai aur koii ise jhuTla nahi.N sakta. Aurat per ik Nazam likhi hai, Ummeed hai aap ko pasand aaegi
Yeh aurat woh paheli hai jo jaani hai na jane.Nge
Hazaaro.N gham yeh sehti hai
Magar haNsti hi rehti hai
Zamane ki isey parvah
Sabhi log is se la parvah
Hai aurat zaat hi aesi
Na jeeti hai na marti hai
Magar hai baala ter sub se
Yeh mana hai na mane.Nge
Yeh aurat woh paheli hai jo jaani hai na jane.Nge
Kabhi Maryam kabhi Seeta
Kabhi Qura.N kabhi Geeta
Kabhi Sheeri.N kabhi Heera
Kabhi Laila kabhi Meera
Kabhi biwi kabhi Maa.N hai
Kisi ka dil hai aur Jaa.N hai
Sabhi ka yeh sahara hai
PhaNsi kashti ka toofa.N mai.N
Yehi tou ik kinara hai
Yeh sub ki raah takti hai
Mohabbat ko tarasti hai
Magar aakhir tou aurat hai
Sisakti hai bilakti hai
Yeh ik aesa moamma hai
Na samjha hai na samjhe.N ge
Yeh aurat woh paheli hai jo jaani hai na jane.Nge
Ise parvah nahi.N apni
Magar sehti hai gham sub ke
Gharasti ki khooshi khatir
Magar rehti hai yeh dub ke
Yeh sub ke saath haNsti hai
Yeh sub ke saath roti hai
Jub ghar mei.N sub hei.N so jate
Tou jaa ker phir yeh soti hai
Ajab iski lagan dekhi
Ajab iska chalan dekha
Magar yeh mard na shukre
Na samjhe hei.N na samjhe.Nge
Yeh aurat woh paheli hai jo jaani hai na jane.Nge
Mili khushiya.N zamaane ki
Tou sub mei.N baa.NT deti hai
Jo gham ki raat aaii tou
Akele kaa.NT deti hai
Yehi iska badappan hai
Yehi tou iski azmat hai
Koii mane ya na mane
Yeh sirf aurat ki taqat hai
Ke dunya is se qayem hai
Tabhi tou lafz-e-dunya bhi
Muzakkar nahi.N moannas hai
Magar mardo.N ki hut hai yeh
Na mana hai na mane.Nge
Yeh aurat woh paheli hai jo jaani hai na jane.Nge
Fakhri
|