Gulon meiN Rang Bhare Baad-e-naubahaar Chale...!! (Faiz Ahmed Faiz) -
16th April 2015, 11:29 AM
guloN meiN rang bhare baad-e-naubahaar chale
chale bhi aao ke gulshan ka kaarobaar chale
qafas udaas hai yaaroN saba se kuch to kaho
kahiN to bahr-e-Khuda aaj zikr-e-yaar chale
kabhi to subh tere kunj-e-lab se ho aaghaz
kabhi to shab sar-e-kaakul se mushakbaar chale
baDa hai dard ka rishta yeh dil gharib sahi
tumhare naam pe aayen ge gham-gusaar chale
jo hum pe guzri so guzri magar shab-e-hijraaN
hamaare ashk teri aaqibat sanwaar chale
maqaam "Faiz" koi raah meiN jaccha hi nahi
jo koy-e-yaar se nikle to soo-e-daar chale
- Faiz Ahmed Faiz
*hSn* : parStaar
tumhara shoq dekha to ghazal hum ne nazar kar di!
kabhi fursat meiN sun lena, bohat ashaar baqi haiN... ("Asad")
|