ik nazre taghaaful karke tu jo uth bhee gayi rukhsat bhee huyi.
mat poochho meree haalat mujhse main ro bhee padaa hairat bhee huyi.
Hmmmmmmmm… Khooob Or Rawaan Matla…
har saans men rezaa qat-qat ke jeevan ka guzaara karte hai,
ab maut hamaari yu samjho hasrat bhee huyi haajat bhee huyi.
Wahhhh….. Acha Kaha
ye hijr ke mausam guzrenge wo wasl kee raate aayengee,
mai khud ko yu hee bahalaata tha par dil men kahee dahasat bhee huyi.
Wah Wah Saheb……. Ye Bhi Umdah Raha
kuch log muhabbat karte hai kuch log muhabbat jeete hai,
dil-dil pe munhasir hota hai daanaaee huyi wahashat bhee huyi.
Hmmmmm
wo aaye they aake mujhko chhuaa aur chhooke chal bhee diye,
kuch pal men dekho kya-kya huyaa main jee bhee uthaa mayyat bhee huyi.
Acha Hai …. Magar Aik Baat Kahun Ga……… Yahan “Mayyat” Lafz Adjust ni Ho Ga… Sher Ke Maf’hoom Ke Mutabiq Yahan “ Maut” Aana Chahiye Tha Magar Ye Hum Qaafia Nahi Hai… Is sab ke Baa-wajood Ye Kahun Ga Ke Aap Ye Lafz “ MAYYAT” Badal Kar Koi Or Laga Len.. Ya Ye Misra Hee Badal Len…
kyun haal main apnaa khastaa jaa dunyaa ko ufaq dikhlaata hu,
sab mujhpe taras khaate bhee hai so khud se mujhe nafrat bhee huyi.
Acha Maqta Hai…. Rawaani Me Hai Magar Aik Baat…..
Pehla Misra Agar Aap Seedha Adaa Kren Gay To Samajhnay Me Or Parhnay Me Ziaada Aasaani Aaye Gi….
Kiun KHasta Haal Main Apna Ufaq Dunia Ko Ja Dikhlata Hun
Janab Ufaq Sb… In Tamam Baton Ke Sath sath Main Itna Zaruur Kahun Ga Ke Aap ne Boht Rawaan Dawaan Or Achi Ghazal Kahi Hai….. Daaad Qabool Farmaiye…….
Likhtay Rahiye