nah peene meN kamee hotii, nah saaqi se gilaa hotaa -
20th November 2014, 09:05 AM
Leejiye, "Chakbast" ki ik Ghazal Haazir-e-Khidmat hai,
ummeed hai aap ko pasand aayegi
----------------------------------------------
Ghazal
agar dard-e-moHabbat se nah insaaN aashnaa hotaa
nah kuChh marne kaa Gham hotaa, nah jeene kaa mazaa hotaa
mai-e -gul-rang luT'ti, yuuN dar-e-maiKhaana vaa hotaa
nah peene meN kamee hotii, nah saaqi se gilaa hotaa
hazaaroN jaan dete haiN butoN ki be-wafaai par
agar in meN se ko'ii baa-wafaa hotaa to kyaa hotaa
agar dam bhar bhi miT jaati Khalish Khaar-e-tamanna ki
dil-e-Hasrat-talab ko apni Hasti se gilaa hotaa
yeh maana, be-hijaabaana nigaaheN qahr kartii haiN
magar Husn-e-Hayaa-parvar kaa aalam duusaraa hotaa
~Brij Narayan Chakbast
==============================================
|