A Tribute to Mirza Ghalib saheb by Rahat Fateh saheb... (Must Read/Watch)

[Hassan]

Adaab dostoN! Mirza Asadullah Khan Ghalib saheb ko tribute dete hue,
Rahat Fateh Ali Khan saheb ne apni mashoor-kun awaaz meiN,
neeche di gayiN ghazloN meiN se kuch ashaar ko bohat dil-nasheeN andaaz meiN gayaa hai...
meri taraH aap bhi yakenan lutf-andooz hooN ge, video link:-
http://www.dailymotion.com/video/xub...ptv-home_music (must watch/listen)


yeH jo hijr meiN dewaar-o-dar ko dekhte haiN
kabhi saba ko kabhi naama-bar ko dekhte haiN

woH ayeN ghar meiN hamare Khuda ki Qudrat hai
kabhi hum un ko kabhi apne ghar ko dekhte haiN

nazar lagay na kahiN us ke dast-o-bazu ko
yeH loG kyuN mere zakhm-e-jigar ko dekhte haiN

tere jawahir-e-tarf-e-kulaa ko kia dekheN!
hum ooj-e-taala laal-o-gohar dekhte haiN

~*~*~*~*~*~*~*~*~*~*~*~*~*~*~*~*~

aah ko chaiye ik umr asar hone tak
kon jeeta hai teri zulf ke sar honay tak

daam hur mooj meiN hai halqa-e-sad kaam-e-nihang
dekheN kia guzray hai qatray pe, guhar honay tak

aashiqui sabr talab, aur tamanna be-taab
dil ka kia rang karoN khoon-e-jigar honay tak

hum ne maana ke taghaful na karo ge, lekin
khaak ho jayeN ge hum, tum ko khabar honay tak

par-tu-e-khuur se, hai shabnam ko fana ki taleem
maiN bhi hooN, aik inayat ki nazar honay

aik nazar beesh nahi fursat-e-hasti ghaafil
garmi-e-bazm hai ik raqs sharrar honay tak

gham-e-hasti ka, Asad! kis se ho juz marg, ilaaj
shama hur rang meiN jalti hai sehar honay tak

~*~*~*~*~*~*~*~*~*~*~*~*~*~*~*~*~

bus ki dushwaar hai hur kaam ka aasaaN hona
aadmi ko bhi mayassar nahi insaaN hona

giriya chaahe hai kharaabee mere kaashaane ki
dar-o-deewaar se Tapke hai bayaabaaN hona

giriyaaN : weeping
kaashaana : house
bayaabaaN : wilderness

waa-e-deewaangee-e-shauq, ke har dam mujhko
aap jaana udhar aur aap hee hairaaN hona

jalva az_bas ki taqaaza-e-nigah karta hai
jauhar-e-aaina bhee chaahe hai mizhgaaN hona

az : from/then/by
jauhar : skill/knowledge
mizhgaaN : eyelid

ishrat-e-qatl_gah-e-'ehl-e-tamanna mat pooch
id-e-nazzaara hai shamsheer ka uriyaaN hona

ishrat : joy/delight
shamsheer : sword
uriyaaN : naked/bare

le gaye khaak meiN hum daaGH-e-tamanna-e-nishaat
too ho aur aap ba_sad_rang-e-gulistaaN hona

nishaat (or nashaat) : enthusiasm/happiness
sad_rang : hundred colours

ishrat-e-paara-e-dil, zaKHm-e-tamanna_KHaana
lazzat-e-reesh-e-jigar gharq-e-namakdaaN hona

ishrat : joy/delight
paara : fragment/piece
lazzat : taste
reesh : wound
gharq : drown/sink
namakdaaN : container to keep salt

kee mere qatl ke baad usne jafa se tauba
haay us zood_pashemaaN ka pashemaaN hona

jafa : oppression
zood ; quickly
pashemaaN : ashamed/embarrassed

haif us chaar girah kapDe ki qismat 'GHalib'
jis ki qismat meiN ho aashiq ka girebaaN hona

haif : alas!
girah : one sixteenth of a yard
girebaaN : collar

- Mirza Asadullah Khan Ghalib