Quote:
Originally Posted by Salman Ahmed 12121
plsss tell me....
Ek mukammal gajal kya hai.....
jise hum keh sken ye gajal hai....
|
Salman Ahmed saab,
aapka iis thread me pehle to istaqbaal karta hu...
aapke savaal ke javaab yahaa aapko baaki threads se mil sakte haiN.. magar unko padhne se pehle kuch cheezeN ek gazal ko mukammal karti hai vo niche hai:
1. Har Gazal ek hi Behr me likhi jaani chahiye
Beher ki samajh ke liye:
http://www.shayri.com/forums/showthread.php?t=69311
e.g. 1212 1122 1212 112
guloN meN raNg bhare baad-e-nau-bahaar chale
(1 2) (1) (2 1) (1 2) (2 1 2 1 2 1) (1 2)
chale bhii aao ke gulshan ka kaarobaar chale
(1 2) (1) (2 1) (1) (2 2) (1) (2 1 2 1) (1 2)
2. Har mukammal Gazal me kaafiya aur radeef hona zaruri hai
Bina radeef ki bhi Gazal likh sakte haiN, aisi Gazal ko Gair muraddaf Gazal kehte haiN
3. Har gazal ka ek matla hota hai, jo Gazal ka avval sher hota hai, jiske dono misroN meN kaafiye aate haiN
Ek se zyaadaa matle bhi likh sakte haiN, jinme pehle matle ko matlaa-e-oola aur baki matloN ko matla-e-saani ya husn-e-matla kehte haiN
4. Isii tarah har gazal meN ek maqta hota hai jo Gazal ka aakhri sher hota hai. jyaadatar aaj kal shaayar maqte ka istemaal kam karte haiN. maqta usi sher ko kahaa jaataa hai, jisme shaayar apna takhallus istemaal karta hai.
5. Har gazal me kam se kam 5 sher hone chahiye (including matla & maqta).
Example ke taur pe upar likhi Gazal ko hi lete haiN
guloN meN raNg bhare baad-e-nau-bahaar chale
chale bhii aao ke gulshan ka kaarobaar chale
qafas udaas hai yaaroN sabaa se kuchh to kaho
kahiN to bahr-e-KHuda aaj zikr-e-yaar chale
jo hum pe guzri so guzri magar shab-e-hijraaN
hamaare ashq teri aaqibat saNvaar chale
yahaaN pe radeef hai: chale
kaafiye haiN: bahaar, kaarobaar, yaar, saNvaar etc.
pehla sher matla hai.
iis Gazal ka mqta hai;
maqaam 'Faiz' koii raah me.N jachaa hi nahii
jo kuu-e-yaar se nikle to suu-e-yaar chale
yahaaN Ahmed Faiz saab ne apna takhallus istemaal kiya hai, aur suu-e-yaar kaafiyaa hai.
ab aap kahenge ki behr me takti ka istemaal kaise ho? to uski samajh aapko niche di gayii link wale thread me mil jaayegi.
http://www.shayri.com/forums/showthread.php?t=76827
aur bhii uljhan ya savaal ho to bezijak aap yahaa puchh sakte haiN.