Jaun Eliya saahab ki ek Ghazal mehfil ki khidmat meiN haazir hai, agar ehbaab ko kabhi Jaun Eliya saahab ko mushaayrey meiN Ghazal/nazm padhte hue kisi video meiN dekhen ka mauqa miley to zaroor dekhiyega, inka aNdaaz-e-bayaan kuch aur hi hai
zaKhm-e-ummiid bhar gayaa kab kaa
Qais to apne ghar gayaa kab kaa
aap ik aur niind le liijiye
qaafilaa kuuch kar gayaa kab kaa
dukh ka lamhaa azal abad lamhaa
vaqt ke paar utar gayaa kab kaa
apna muuNh ab to mat dikhaoa mujhe
naasiho, maiN sudhar gayaa kab kaa
nasshaa hone kaa be-tarah thaa kabhi
par vo zaalim utar gayaa kab kaa
aap ab puuchney ko aaye haiN?
dil merii jaan, mar gayaa kab kaa