Lahjawab Ghazal

[zishan107]

Kal chaudhavin ki rat thi shab bhar raha charcha tera
Kuch ne kaha ye chand hai kuch ne kaha chehara tera

Ham bhi vahin maujud the ham se bhi sab pucha kiye
Ham hans diye ham chup rahe manzur tha parda tera

Is shahar men kis se milen ham se to chuti mahafilen
Har shakhs tera nam le har shakhs divana tera

Kuche ko tere chod kar jogi hi ban jayen magar
Jangal tere parbat tere basti teri sahara tera

Ham aur rasm-e-bandagi ashuftagi uftadagi
Ehasan hai kya kya tera ai husn-e-beparva tera

Do ashk jane kis liye palkon pe a kar tik gaye
Altaf ki barish teri ikram ka dariya tera

Ai bedareg-o-beaman ham ne kabhi ki hai fugan
Ham ko teri vahashat sahi ham ko sahi sauda tera

Tu bevafa tu maharaban ham aur tujh se bad-guman
Ham ne to pucha tha zara ye vaqt kyun thahara tera

Ham par ye sakhti ki nazar ham hain faqir-e-rahguzar
Rasta kabhi roka tera daman kabhi thama tera

Han han teri surat hasin lekin tu aisa bhi nahin
Is shakhs ke ashar se shohara hua kya kya tera

Beshak usi ka dosh hai kahata nahin khamosh hai
Tu ap kar aisi dava bimar ho achcha tera

Bedard sunani ho to chal kahata hai kya achchi gazal
Ashiq tera rusava tera shayar tera "insha" tera


Ibne Insha

Zishan IB2Z