[Hassan]

Adaab hazireen-e-meHfil-e-ishQ,

alfaazoN ki tehmeed mujh se baandhi nahi jaati...
seedhi si baat hai mujhe tum se mohabbat hai...(nm)

Pesh-e-khidmat hai ik taaza ishQ 'koshish':-


tujhe chaand kaheN ya chaandni
tere husn pe karte haiN shayari

bikhray gi jab lafz lafz teri khusbu!
ghazal meiN bhi aa jaye gi dilkashi

phool bhi hairaaN haiN chaman meiN
baagh meiN khili jab se haseeN kali

gul-e-gulaab bhi zameeN boos hua
gulaabi aankhoN per jab nazar pad’i

Qurbat-e-yaar is jahaN toH la-haasil!
hai yaQeen us jahaN wohi apni zindagi

sir-ba-sajoood hue kayi baar din meiN!
Rab se maangi ussi ki hansi-khushi

sar-e-raaH mil jao kisi roZ hum se!
piyaase sehraa ki bhuja doH tishnagi

jamal-e-yaar pe nazar aise thehri!
dheere dheere karne lagay aashiQi

‘hSn’ kyuN madhoosh ho chala hai!
wajaH shayed ‘parStaar’ ki naazuk Pari