[Dhaval]

Falak se TooT kar jaise sitaaraa mil gayaa hotaa
Agar wo bheekh mei'n mujhko dobaaraa mil gayaa hotaa

Unhone keh diya baazaar mei'n sab kuch milega par
Kahaa'n baazaar mei'n wo dil hamaaraa mil gayaa hotaa

Diwaanaa yoo'n zamee'n ki godd mei'n sotaa nahi'n shayad
Tumhaaree chaahto'n ka gar nazaaraa mil gayaa hotaa

Kisee ke zehn mei'n aayaa nahi'n tere sivaa koyee
Nahi'n to dar pe uske shehr saaraa mil gayaa hotaa

Jo meree haisiyat tere baraabar kee rahee hotee
Mujhe teree muhabbat ka sahaaraa mil gayaa hotaa

Ghamo'n ki bheed mei'n kitne akele reh gaye ho tum
Tumhei'n bhi kaash wo dilbar tumhaaraa mil gayaa hotaa