[Pradhyuman]

Dosto,

ek taaza ghazal pesh kar rahaa hun..aapke raaey ki umeed rahegi.


kuch teri nigaah se chupa nahiN
so laboeN pe ab koi duaa nahiN

kuch mila ya na mila gilaa nahiN
maiN khudi se aaj tak milaa nahiN

ajnabee ki shaql meiN dikha lekin
kaarwaan der tak rukaa nahin

jaa rahaa ye raastaa kahaan bataa?
ta-umar hi jo safar kataa nahiN

shokh kaaghaz sa tha ye dil jahaaN
rang rishtoeN ka tha ghulaa nahiN

koste ho baarishoeN ko tum magar
phool bay kaef tha khila nahiN

woh mere baad bhi meraa rahe
aisi khwahish to kar chalaa nahin

waqt kaatil bhi hai hakeem bhi
aur mareez-e-ishq ki dawaa nahiN

fursato’n meiN sochte yahi bismil
kyun sukooN se waastaa huaa nahiN

Pradhyuman - Bismil